Ստամբուլում ժամանակավորապես արգելվել են <<պատերազմին ոչ>>ասող ակցիաներն ու միջոցառումները

Ստամբուլի նահանգապետարանը մինչև մարտի 10-ն արգելել է նահանգի տարածքում «պատերազմին ոչ» ասող միջոցառումներն ու ակցիաները, նաև բոլոր այն ակցիաները, որոնք կքննադատեն թուրքական բանակի գործողությունները Սիրիայում: Այս մասին տեղեկացնում է birgun.net կայքը:

Նահանգապետարանի հայտարարությունում ասված է, որ «այս զգայուն ժամանակահատվածում, երբ Թուրքիան Սիրիայում զոհեր ու պատերազմի հերոսներ ունի» «ոչ պատերազմին» և նմանատիպ այլ կարգախոսերով անցկացվող հանրահավաքները, քայլերրթները, մամուլի ասուլիսները, ստորագրահավաքները, տաղավարներ տեղադրելը, թռուցիկներ բաժանելն ու նմանատիպ այլ միջոցառումները սպառնալիք են հանրային կարգի պահպանման, հանցագործությունների կանխարգելման և մարդկանց իրավունքների և ազատությունների երաշխավորման համար:

Տեղեկացվում է, որ միջոցառումների արգելքը գործում է մարտի 1-ից մինչև մարտի 10-ը:

Հիշեցնենք, որ փետրվարի 27-ի երեկոյան թուրքական բանակը սկսել է ցամաքային և օդային հարվածներ հասցնել սիրիական բանակի դիրքերի ուղղությամբ:

«Ռոսիա-24» հեռուստաալիքը հայտնել էր, որ Սիրիայի Իդլիբ նահանգում թուրք զինվորականներն ու ընդդիմադիր գրոհայինները կրակ են բացել սիրիական և ռուսական օդուժի ուղղությամբ՝ փորձելով խոցել ռազմական ինքնաթիռները:

Թուրքիայի Հաթայ նահանգի նահանգապետ Ռահմի Դողանը հայտարարել է, որ Սիրիայի կառավարական ուժերի օդային հարվածների հետևանքով թուրքական զինված ուժերը 33 զոհ և 32 վիրավոր ունի:

Իրավիճակն Իդլիբում շարունակում է ծայրահեղ լարված մնալ:

Share This

COMMENTS

Wordpress (0)
Disqus (0 )