Գյումրու փոսերը սուբվենցիայի սպասումով
Գյումրիի բազմաթիվ փողոցներ շարունակում են մնալ անմխիթար վիճակում։ Անձրևներից հետո փոսերը վերածվում են ջրափոսերի, իսկ չոր եղանակին՝ փոշու աղբյուրի՝ դժվարացնելով թե՛ վարորդների, թե՛ հետիոտների տեղաշարժը։
Քաղաքացիները տարիներ շարունակ բարձրաձայնում են նույն խնդիրը՝ նշելով, որ ճանապարհների վերանորոգումը հաճախ հետաձգվում է՝ սուբվենցիոն ծրագրերի հաստատման կամ ֆինանսավորման սպասումով։ Մինչ համապատասխան ծրագրերը դեռ ընթացքի մեջ են, վնասվում են ավտոմեքենաները, մեծանում է վթարների վտանգը, իսկ բնակիչների դժգոհությունը՝ խորանում։
Թեև սուբվենցիոն ծրագրերը կարևոր հնարավորություն են համայնքների ենթակառուցվածքները բարելավելու համար, բնակիչների կարծիքով առաջնահերթ լուծման կարիք ունեցող ճանապարհները չպետք է երկար ժամանակ մնան անուշադրության մատնված։
Գյումրեցիները հույս ունեն, որ ճանապարհների հիմնանորոգման աշխատանքները կսկսվեն հնարավորինս արագ, որպեսզի քաղաքի փողոցները վերջապես ազատվեն երկար տարիների փոսերից և դառնան անվտանգ ու հարմարավետ բոլորի համար։