Ինչպես տարբերել երիկամների հիվանդություններով պայմանավորված այտուցները <<սրտային>> այտուցներից
Այտուցները հյուսվածքներում ավելորդ հեղուկի կուտակումն են, ինչը սովորաբար պայմանավորված է լինում այս կամ այն հիվանդություններով: Որպես կանոն այտուցների պատճառ են հանդիսանում երիկամների ու սրտամկանի հիվանդությունները, որոնք կարող են շատ վտանգավոր լինել, սակայն մարդիկ ոչ միշտ են կարողանում ինքնուրույն պարզել, թե առողջական ինչ խնդրի մասին են հուշում այտուցները:
Մասնագետների խոսքով՝ կան տարբերություններ, որոնք թույլ են տալիս տարբերել երիկամների հիվանդություններով պայմանավորված այտուցները սրտամկանի հիվանդություններով պայմանավորված այտուցներից: Օրինակ՝ «երիկամային» այտուցները սովորաբար հավասարապես են բաշխվում ամբողջ մարմնով, սակայն երկար ժամանակ «ոտքի վրա» անցկացնելու դեպքում դրանք կարող են առավել ակնհայտ լինել սրունքների հատվածում: Երիկամների հիվանդությունների դեպքում հեղուկը հազվադեպ է կուտակվում որովայնի հատվածում ու թոքերի շուրջը, իսկ լուրջ դեպքերում այս այտուցները կարող են դառնալ քաշի զգալի ավելացման պատճառ: Բացի այդ, «երիկամային» այտուցների դեպքում մաշկի գունատվում է, ինչը բնորոշ չէ այտուցների մյուս տեսակներին:
«Երիկամային» այտուցները «սրտային» այտուցներից տարբերելու համար հարկավոր է առաջին հերթին հիշել, որ երիկամների հիվանդությունների դեպքում այտուցները շատ արագ են զարգանում, մինչդեռ «սրտային» այտուցները զարգանում են աստիճանաբար:
Երիկամային հիվանդությունների դեպքում առաջին հերթին այտուցվում է դեմքը և հատկապես կոպերը, մինչդեռ սրտի հիվանդությունները դրսևորվում են որովայնի հատվածի այտուցվածությամբ: Բացի այդ, սրտամկանի հիվանդությունների դեպքում հաճախ այտուցվում ու մեծանում է նաև լյարդը, ինչը բնորոշ չէ երիկամների հիվանդություններին:
«Երիկամային» այտուցները կարելի է «տեղաշարժել» ձեռքերով, մինչդեռ «սրտային» այտուցներն ավելի պինդ են ու չեն «շարժվում»: Բացի այդ, սրտամկանի հիվանդություններով պայմանավորված այտուցների դեպքում մարդու քաշը հազվադեպ է ավելանում կամ ավելանում է աննշան, մինչդեռ երիկամային հիվանդությունները կարող են հանգեցնել քաշի զգալի ավելացման:
Երիկամային հիվանդությունների մասին հուշող ախտանշան կարող է լինել նաև զարկերակային գերճնշումը, որը դժվարությամբ է բուժման ենթարկվում, ուստի այս ախտանշանը նույնպես չի կարելի անուշադրության մատնել:
Նյութի աղբյուրը՝ medikforum.ru