Այնտեղ բաներ կան, որ դե ֆակտո իրագործված են. Էդմոն Մարուքյանը՝ Արցախին, Սյունիքին վերաբերող փաստաթղթի տեքստի մասին
Երբ նայեք փաստաթուղթը, կտեսնեք, որ այնտեղ բաներ կան, որ դե ֆակտո իրագործված են, և, հետևաբար, մենք հիմնավոր կասկած ունենք, որ դա կա՛մ բանավոր պայմանավորվածությամբ իրականացվածի տեքստն է և միգուցե չստորագրված, կա՛մ իրականում ստորագրված տեքստն է: Այս մասին ԱԺ ճեպազրույցի ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Արցախին ու Սյունիքին վերաբերող տեքստին, որը լայնորեն տարածվել է համացանցում:
«Հիմա արդեն երեք օր է՝ այդ տեքստը տարածվում է սոցիալական ցանցերում, բարդ է իշխանության համար հերքել, որ նման բան չկա: Ավելին ասեմ, անգամ պետք է քննություն իրականացվի՝ որտեղից է այդ տեքստը ընկել հայկական մեդիա դաշտ, ազգային անվտանգության խնդիր էլ եմ տեսնում, բայց նաև փաստ է, որ Ավինյանն ասում էր՝ կա փաստաթուղթ՝ ստորագրված, չհերքեց, ասեց՝ գաղտնիք կա և այլն»,-ասաց նա՝ ավելացնելով, որ պատգամավորները նաև հարցումներ են ուղարկել ԱԱԾ:
Էդմոն Մարուքյանը հիշեցրեց, որ իրենք առաջարկել են ստեղծել փաստահավաք խումբ: «Ովքեր դեմ են ստեղծմանը, նրանք ուզում են, որ անդադար երկրում մարդիկ միկրոֆոններով պտտվեն և հարցնեն՝ ով է մեղավոր, անդադար բամբասանք շրջանառվի, իրանց ասած «մեդիա տեռոր» լինի, թաց ու չորը վառվեն գնան, այդպես էլ չիմանանք՝ ով էր մեղավոր, ով՝ ոչ»,-ասաց նա: