Ընտրություններից առաջ դժգոհությունն աճում է, բայց ընդդիմությունը դեռ չի համախմբվում ընդդեմ Փաշինյանի
Հունիսի 7-ին Հայաստանում նախատեսված խորհրդարանական ընտրություններին ընդառաջ քաղաքացիների զգալի մասի դժգոհությունը թե՛ կառավարությունից, թե՛ քաղաքական համակարգից, ընդհանուր առմամբ, աստիճանաբար ավելի ակնհայտ է դառնում. գրել է Коммерсант-ը:
Փաշինյանի նախընտրական քարոզարշավը մթագնվել է աղմկոտ սկանդալներով և ընտրողների հետ բախումներով, հիմնականում՝ Ղարաբաղի հարցի շուրջ: Միևնույն ժամանակ՝ հայկական մասնատված ընդդիմությունը դեռևս չի կարողացել ապահովել բավարար աջակցություն՝ նոր խորհրդարանում մեծամասնություն ապահովելու համար:
Վարչապետի համար ամեն ինչ միշտ չէ, որ հարթ է ընթանում: Նա հաճախ է հանդիպում դժգոհ քաղաքացիների, որոնց հետ երկխոսությունը դժվար է: Ընտրողների և հայ քաղաքական գործիչների միջև փոխազդեցության մեջ ամենազգայուն հարցը մնում է Լեռնային Ղարաբաղը: Վերջին տարիներին Նիկոլ Փաշինյանը իսկապես զգալիորեն կոշտացրել է իր հռետորաբանությունը Ղարաբաղի հարցի վերաբերյալ։
Մինչ նա նախկինում հայտարարում էր, թե տարածքի անորոշ կարգավիճակի հետ կապված հարցերը զրկում են երկրին անկախությունից և ինքնիշխանությունից, վերջերս նա այնքան հեռու է գնացել, որ նշել է, թե Ղարաբաղը երբեք էլ հայկական չի եղել, և որ հարցի վերաբացումը սպառնալիք է Ադրբեջանի հետ խաղաղությանը (որը, սակայն, դեռևս իրավաբանորեն չի ապահովվել):
Նիկոլ Փաշինյանը վաղուց հույս ուներ լուծելու Ղարաբաղի հարցը, բայց ընտրողների հետ իր շփումներում նա անընդհատ բախվում է այն որոշումների և իրադարձությունների հետևանքներին, որոնք հանգեցրել են այս տարածքի կորստին, այստեղից էլ՝ վարչապետի չափազանց զգացմունքային արձագանքը այս հարցին:
Ընդդիմությունը ևս հաճախ վերադառնում է ղարաբաղյան հարցին՝ դրանով իսկ բացատրելով, թե ինչու է Նիկոլ Փաշինյանի կառավարության արտաքին քաղաքականությունը համարում ձախողված: Սակայն վարչապետի հակառակորդները չեն կարողանում որևէ լուծում առաջարկել այս խնդրի համար՝ հիմնականում այն պատճառով, որ նույնիսկ անհամարձակորեն արտահայտված գաղափարներն, ինչպիսիք են հայերի վերադարձը Ղարաբաղ՝ նրանց անվտանգության միջազգային երաշխիքներով, անհնար է իրականացնել ներկայիս պայմաններում:
Զարմանալի չէ, որ ընդդիմությունը նույնպես լայն վստահություն չի վայելում Հայաստանում, ինչը նշանակում է, որ Նիկոլ Փաշինյանի հակառակորդները դեռևս չեն կարող հույս դնել նրա վճռական պարտության վրա: