Ընդհանուր առմամբ կարծում են, որ տղամարդիկ ավելի ագրեսիվ են, քան կանայք, և բազմաթիվ հետազոտություններ հաստատում են դա: Սակայն նոր միջազգային ուսումնասիրությունը կասկածի տակ է դնում այս տարածված պատկերացումը մեկ կարևոր համատեքստում՝ քույր-եղբայրական հարաբերություններում:
PNAS Nexus ամսագրում հրապարակված ուսումնասիրությունը պարզել է, որ աղջիկներն ու կանայք ավելի անմիջականորեն ագրեսիվ են իրենց քույր-եղբայրների նկատմամբ, քան տղաներն ու տղամարդիկ:
Դուգլաս Թ. Քենրիկի, Մայքլ Է. Վ. Վարնումի և գործընկերների մեծ թիմի (ընդհանուր առմամբ 51 հեղինակ) կողմից անցկացված ուսումնասիրությունը ներառել է 24 երկրներից 4136 մասնակից: Հարցվածներին հարցրել են, թե որքան հաճախ են նրանք ագրեսիա դրսևորել մանկության և մեծահասակության տարիներին՝ ֆիզիկական (հարված, գոռոց) կամ անուղղակի (լուրեր տարածել, ծնողների մասին պատմել) քույր-եղբայրների, ընկերների և ծանոթների նկատմամբ:
Պարզվել է, որ աղջիկներն ու կանայք փոքր-ինչ, բայց վիճակագրորեն նշանակալիորեն ավելի անմիջական ագրեսիա են ցուցաբերել իրենց հարազատների նկատմամբ, քան տղաներն ու տղամարդիկ:
Ի տարբերություն դրա, տղամարդիկ և երիտասարդ տղամարդիկ ավելի հաճախ են նման ագրեսիա ցուցաբերել ոչ հարազատների նկատմամբ: Ինչ վերաբերում է անուղղակի ագրեսիային, ապա դրա մակարդակը տղամարդկանց և կանանց մոտ եղբայրների և քույրերի նկատմամբ մոտավորապես նույնն էր թե՛ մանկության, թե՛ չափահասության տարիներին։
Նշենք, որ այս օրինաչափությունը կապված չէ երկրներում գենդերային հավասարության մակարդակի հետ. այն դրսևորվում է ինչպես հարուստ, այնպես էլ աղքատ երկրներում, ինչպես նաև արևմտյան և ոչ արևմտյան մշակույթներում։ Ուսումնասիրության հեղինակները կարծում են, որ սա կարող է վկայել երևույթի համընդհանրության մասին. այն, որ եղբայրների և քույրերի միջև հարաբերություններում ագրեսիայի առանձնահատկությունները ունեն սոցիալ-համատեքստային բնույթ, որը տարբերվում է այլ սոցիալական իրավիճակներում փոխազդեցության դինամիկայից։