Մեծ Բրիտանիայի խորհրդարանը հաստատել է դեկտեմբերի 12-ին արտահերթ խորհրդարանական ընտրություններ անցկացնելու վերաբերյալ նախագիծը
Մեծ Բրիտանիայի խորհրդարանի Լորդերի պալատը (օրենսդիր մարմնի վերին պալատ) հավանություն է տվել Միացյալ Թագավորության վարչապետ Բորիս Ջոնսոնի՝ դեկտեմբերի 12-ին արտահերթ խորհրդարանական ընտրություններ անցկացնելու առաջարկությանը, հաղորդում է ТАСС-ը:
Աղբյուրը նշում է, որ երեքշաբթի արտահերթ ընտրությունների մասին օրինագիծը հաստատվել էր նաև խորհրդարանի ստորին՝ Համայնքների պալատի կողմից, այսինքն՝ նախագիծն անցել է խորհրդարանական քննարկման բոլոր փուլերը և օրենքի կարգավիճակ կստանա, երբ փաստաթուղթը կստորագրի Էլիզաբեթ Երկրորդ թագուհին:
Արտահերթ ընտրությունները դեկտեմբերի 12-ին անցկացնելու համար գործող խորհրդարանը պետք է լուծարվի ոչ ուշ, քան նոյեմբերի 6-ին:
Նշվում է, որ արտահերթ ընտրությունների միջոցով Ջոնսոնը փորձելու է փակուղուց դուրս բերել Brexit-ի գործընթացը: Իշխող Պահպանողական կուսակցությունը կորցրել է մեծամասնությունը Համայնքների պալատում, առանց որի չի կարող գործարք կնքել ԵՄ-ի հետ, որը համաձայնեցվել էր հոկտեմբերի 17-ին: