«Օհանյան կրթահամալիրին» թույլ տրվեց կրթությունը կազմակերպել անգլերենով
Կառավարությունն իր այսօրվա՝ ապրիլի 18–ի նիստում որոշում կայացրեց, որով թույլ տվեց «Օհանյան կրթահամալիր» ՍՊԸ–ին օտար լեզվով (անգլերեն) կրթություն կազմակերպել։
Այս որոշումը թույլ կտա «Օհանյան» կրթահամալիրին» 2026/2027 ուսումնական տարվանից միջնակարգ կրթության երրորդ աստիճանի ավագ դասարաններում շարունակել «Միջազգային բակալավրիատի «Դիպլոմա (IBDP)» ծրագիրը՝ անգլերենով:
«Օհանյան» կրթահամալիրում 2025–2026 ուսումնական տարվա դրությամբ սովորում է 612 աշակերտ, որոնցից 43-ը՝ ավագ դպրոցում։ Նրանցից 15-ը Միջազգային Բակալավրիատի Դիպլոմա ծրագրի (IBDP) թեկնածուներ են։
Միջազգային բակալավրիատի Դիպլոմա ծրագիրը (ՄԲԴԾ) միջազգայնորեն ճանաչված, երկամյա կրթական ծրագիր է, որը նախատեսված է 16-19 տարեկան սովորողների համար: Այն իրականացվում է ՀՀ–ում՝ Միջազգային բակալավրիատի կազմակերպության (IBO) կողմից հավատարմագրված կրթական հաստատություններում:
«Օհանյան» կրթահամալիրի կողմից «Միջազգային բակալավրիատի «Դիպլոմա» ծրագիրն (ՄԲ) իրականացնելը նաև հնարավորություն է տալիս մայրենի լեզվի ոչ բավարար իմացությամբ հայ երիտասարդներին ավագ դպրոցը ավարտել հայրենիքում՝ ստանալով միջազգային չափանիշներին համապատասխան կրթություն:
«Օհանյան» կրթահամալիրը Մայքրոսոֆթի կողմից ճանաչվել է որպես «Միջազգային նորարար դպրոց» և հանդիսանում է Եվրոպական e-Twinning դպրոցների համայնքի անդամ, ինչը սովորողներին հնարավորություն է տալիս մասնակցել միջազգային նախագծերի, զարգացնել թվային հմտությունները և համագործակցել աշխարհի տարբեր երկրների դպրոցների հետ։
Որոշման ընդունումը կապահովի կրթության որակի բարձրացումը և սովորողների մրցունակությունը միջազգային ասպարեզում՝ միաժամանակ պահպանելով ազգային կրթական արժեքները:
ՀՀ կառավարության ներկայիս քաղաքականությամբ պայմանավորված, կանխատեսվում է Սփյուռքի հայ ընտանիքների ներհոսք։ Ավագ դպրոցում երեխաների կրթությունն ապահովելու հնարավորությունը կնպաստի ընտանիքների հայրենիք տեղափոխվելու որոշմանը։
Միևնույն ժամանակ, արտերկրի քաղաքացիների համար միջազգային կրթություն ստանալը հնարավոր է ՀՀ-ում, ինչը լրացուցիչ գումարների ներհոսք կարող է ապահովել՝ նպաստելով կրթության ոլորտի զարգացմանը։