Միշելի` եռակողմ հանդիպումից հետո տարածած հայտարարության մեզ համար, մեղմ ասած, ոչ նպաստավոր կետերը. «Հայկական ալիք»

Թուրքագետ, պատմական գիտությունների թեկնածու Վարուժան Գեղամյանը գրում է.

«Մինչ դուք հետևում եք Հայաստանի համար այս պահին երկրորդական նշանակության իրադարձության` Թուրքիայի ընտրությունների, ՀՀ դե-ֆակտո թուրքամետ վարչապետը Բրյուսելում ճանաչեց Արցախը որպես Ադրբեջանի մաս:

Պայքարը պետք է չդադարել, որպեսզի էդ ճանաչումը առ ոչինչ լինի»։

Նա նաև ներկայացրել է «Հայկական ալիք»-ի կողմից առանձնացված  ԵԽ նախագահ Շառլ Միշելի` եռակողմ հանդիպումից հետո տարածած հայտարարությունից՝ «մեզ համար, մեղմ ասած, ոչ նպաստավոր կետերը».

«1. «Ղեկավարները վերահաստատել են իրենց անվերապահ հանձնառությունը 1991թ. Ալմա Աթայի հռչակագրին և Հայաստանի (29,800 քկմ) և Ադրբեջանի (86,600 քկմ) տարածքային ամբողջականությանը։ Բանակցությունների ընթացքում կհամաձայնեցվի սահմանի վերջնական սահմանազատումը»։

‼️86.600 քկմ-ի մեջ մտնում է նաև Արցախը: Առավել հստակ ամրագրում այն փաստի, որ ՀՀ դե-ֆակտո իշխանությունները Արցախը հանձնում են թշնամուն, չի կարող լինել: Հանձնում են բացեիբաց, առանց ավելորդ բառախաղի:

2. «Կապի առումով կողմերը հստակ առաջընթաց են գրանցել տարածաշրջանում տրանսպորտային և տնտեսական կապերի ապաշրջափակմանն ուղղված քննարկումներում։ Այս թեմայի շուրջ դիրքորոշումներն այժմ շատ մոտ են միմյանց, մասնավորապես՝ Նախիջևանի հետ և Նախիջևանի միջոցով երկաթուղային հաղորդակցությունը վերականգնելու հարցում։ Նրանց համապատասխան թիմերին հանձնարարվել է ավարտին հասցնել սկզբունքների շուրջ համաձայնության գալը՝ երկաթուղային հաղորդակցության բացման պայմանների և անհրաժեշտ շինարարական աշխատանքների վերաբերյալ` կոնկրետ ժամանակացույցի հետ միասին»:

‼️Նախիջևանի հետ և Նախիջևանի միջոցով Ադրբեջանը միայն մեկ տարբերակ է դիտարկում` «Զանգեզուրի միջանցք» կոչվածը: Դե ինչ, ժամանակագրական հերթականությունը միանգամայն պահպանված է հայտարարության կետերում: Պարզից էլ պարզ է, որ Արցախի հանձնումից հետո հերթն անմիջապես հասնելու է Սյունիքի օկուպացիային և «Զանգեզուրի միջանցք»-ի ծրագիրը կյանքի կոչելուն»։

Հիշեցնենք, որ այսօր  Բրյուսելում կայացել է Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպում, որից հետո Միշելն ասուլիսում մի քանի հայտարարություններ է արել

Share This