Իսրայելի դիվանագիտական հաստատություններն ամբողջ աշխարհում վերսկսել են աշխատանքը
Գործադուլից հետո, ամբողջ աշխարհում Իսրայելի դիվանագիտական հաստատությունների աշխատակիցները վերսկսել են աշխատանքը, Twitter-ի էջում հաղորդել է Տորոնտոյում Իսրայելի հյուպատոսությունը:
«Հյուպատոսությունը, ինչպես և Իսրայելի մյուս դիվանագիտական հաստատություններն ամբողջ աշխարհում վերսկսել են իրենց աշխատանքը»,- ասված է հայտարարության մեջ:
Նշվում է, որ «Իսրայելի ԱԳՆ աշխատակիցների և ֆինանսների նախարարության միջև բանակցությունները կշարունակվեն»:
Ավելի վաղ հաղորդվել էր, որ հոկտեմբերի 30-ի առավոտյան ամբողջ աշխարհում ժամանակավորապես փակվել են Իսրայելի դեսպանատներն ու հյուպատոսությունները:
Դեսպանատների ու հյուպատոսությունների փակման պատճառն Իսրայելի արտգործնախարարության հայտարարած գործադուլն էր: Այս մասին ասված է եղել տարբեր երկրներում (մասնավորապես Ռուսաստանում, Ուկրաինայում, ԱՄՆ-ում, Կանադայում) Իսրայելի դիվանագիտական ներկայացուցչությունների հաղորդագրություններում:
Իսրայելի արտգործնախարարությունը, պաշտպանության նախարարությունը և «Հիստադրութ» միությունը գործադուլ էին հայտարարել՝ կապված երկրի ֆինանսների նախարարության որոշման հետ՝ փոխել տարբեր երկրներում դիվանագետների և ռազմական կցորդների ծախսերը փոխհատուցելու կարգը:
Our Consulate, as well as other Israeli missions around the world, are back to work. Negotiations between MFA employees and the Israeli Ministry of Finance will continue.
— Israel in Toronto (@IsraelinToronto) October 31, 2019