Բազմիցս եղել եմ Նաիրի Հունանյանի խցի մոտ, բայց երբեք ցանկություն չեմ ունեցել նրան տեսնելու․Էդմոն Մարուքյան (տեսանյութ)
Ազգային ժողովի ԼՀԿ խմբակցության ղեկավար Էդմոն Մարուքյանն ԱԺ ճեպազրույցների ընթացքում ասաց, թե ցանկություն չունի մեկնաբանելու Արման Բաբաբաջյանի և «Հոկտեմբերի 27»-ի ոճրագործ Նաիրի Հունանյանի հանդիպումը:
«Այդ հանդիպման հետ կապված հարցերով դիմեք Արման Բաբաջանյանին, ես նրա մամուլի խոսնակը չեմ, որ պատասխանեմ»,-ասաց նա։
Հարցին, թե ցանկություն չունի՞ գործընկերոջ օրինակով հանդիպելու Նաիրի Հունանյանի հետ, Էդմոն Մարոքյանը պատասխանեց, որ մինչև 2012 թվականը եղել է ՔԿՀ-ում հասարակական վերահսկողություն իրականացնող դիտորդական խմբի անդամ:
«Բանտում այցելել եմ այսօրվա իշխանության բոլոր անդամներին, որոնք եղել են քաղբանտարկյալ, այդ թվում՝ հազարավոր դատապարտյալների: Բազմիցս եղել եմ Նաիրի Հունանյանի խցի մոտ, բայց երբեք ցանկություն չեմ ունեցել նրան տեսնելու: Դեպք է եղել, որ մամուլը գրել է, թե իբրև Նաիրի Հունանյանն այնտեղ չէ, բայց խցի մոտով անցել եմ ու համոզվել, որ այնտեղ է: Ես նրան տեսնելու ցանկություն այսօր էլ չունեմ»,-նշեց Էդմոն Մարուքյանը:
Նրա բնորոշմամբ՝ իր համար Նաիրի Հունանյանը դահիճ է, դահիճների պարագլուխ և վստահ է, որ նրա խնդրանքը՝ վաղաժամ ազատ արձակվելու, չի բավարարվելու, քանի որ քննարկման առարկա է նաև հանրության կարծիքը՝ տվյալ անձին հասարակություն հետ ընդունելու վերաբերյալ:
«Գնամ, դահիճի հետ հանդիպեմ, որ ի՞նչ անեմ»,-ասաց Մարուքյանը: