Արա Բաբլոյանի, Գագիկ Հարությունյանի և ՍԴ աշխատակազմի նախկին ղեկավարի դիրքորոշումներն ապացուցում են՝ Արսեն Բաբայանին ներկայացված մեղադրանքը իրականության հետ աղերս չունեն. պաշտպան
Դատարանը, հավանաբար, միաժամանակ կքննարկի և՛ Արսեն Բաբայանի ձերբակալության իրավաչափության դեմ մեր կողմից ներկայացված բողոքը, և՛ վարույթ իրականացնող մարմնի միջնորդությունը` նրա նկատմամբ կալանավորումը որպես խափանման միջոց ընտրելու մասին: Այս մասին լրագրողների հետ զրույցում ասաց ԱԺ աշխատակազմի ղեկավարի նախկին տեղակալ Արսեն Բաբայանի պաշտպան Երվանդ Վարոսյանը:
Հարցին, թե ՍԴ աշխատակազմի նախկին ղեկավարն իր հարցազրույցում պնդել է, որ Գագիկ Հարությունյանի՝ ՍԴ նախագահի լիազորությունները վայր դնելու մասին գրությունն ԱԺ ուղարկել է մարտի 2-ին, արդյոք այդ փաթեթը փոխանցվե՞լ է պաշտպանական կողմին և փաթեթում առկա՞ է նման փաստ, փաստաբանը պատասխանեց.
«Ի զարմանս մեզ, այդ հարցաքննության արձանագրությունը մեզ չի տրամադրվել, դատարանն էլ չի ներկայացրել` մեզ համար, իհարկե, հայտնի պատճառներով, որովհետև ակնհայտ արդարացնող ապացույց է: Ավելին` ես հետևել եմ նաև Արա Բաբլոյանի և Գագիկ Հարությունյանի հարցազրույցներին, այս երեք անձանց դիրքորոշումները միայն բավարար են` պնդելու համար, որ ներկայացված մեղադրանքը իրականության հետ որևէ աղերս ունենալ ուղղակի չի կարող»:
Փաստաբանը նշեց երկու հանգամանք, որոնք, իր խոսքով, բավարար են` պնդելու համար, որ Արսեն Բաբայանի ձերբակալումն ակնհայտ ապօրինի է, և նա գտնվում է ապօրինի անազատության մեջ:
«Ձերբակալման միակ օրինական հիմքը անձի թաքնվելու վտանգն է, և միայն այն հանգամանքը, որ Արսեն Բաբայանն առաջին իսկ կանչով կամավոր ներկայացել է վարույթ իրականացնող մարմին, արդեն իսկ վկայում է այն մասին, որ նրա թաքնվելու վերաբերյալ բոլոր ենթադրությունները սին են: Բացի այդ` նրան ձերբակալելու ժամանակ կասկածանքը վերաբերել է պաշտոնական կեղծիք կատարելուն, ինչը, բնականաբար, համաներման տակ ընկնող մեղադրանք է»,-մեկնաբանեց փաստաբանը:
ԱԺ աշխատակազմի ղեկավարի նախկին տեղակալ Արսեն Բաբայանի պաշտպանները Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում բողոքարկում են Բաբայանին կալանավորելու վերաբերյալ որոշումը:
Հիշեցնենք, որ երեկ՝ հոկտեմբերի 22-ին նշանակված դատական նիստը տեղի չունեցավ, քանի որ Արսեն Բաբայանը չբերվեց դատարան:
Հիշեցնենք նաև, որ հոկտեմբերի 21-ին պաշտոնեական կեղծիք կատարելու կասկածանքով կալանավորվել է Ազգային ժողովի աշխատակազմի ղեկավարի նախկին տեղակալ Արսեն Բաբայանը։ Ըստ ՀՔԾ-ի՝ քրեական օրենսգրքի 300-րդ հոդվածի 1-ին՝ իշխանությունը զավթելու մասով հարուցված քրեական գործի նախաքննության ընթացքում փաստական տվյալներ են ձեռք բերվել այն մասին, որ պաշտոնատար անձինք Սահմանադրական դատարանի նախկին նախագահ Գագիկ Հարությունյանի կողմից լիազորությունները վայր դնելու գործընթացում, խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով կատարել են պաշտոնեական կեղծիքներ։ Նկատի ունենալով, որ բացահայտվել է առերևույթ կատարված նոր հանցագործության դեպք, Հատուկ քննչական ծառայությունում Քրեական օրենսգրքի 314-րդ հոդվածի 1-ին՝ պաշտոնական կեղծիք կատարելու մասով հարուցվել է նոր քրեական գործ, որը միացվել է իշխանությունը յուրացնելու դեպքի առթիվ հարուցված քրեական գործին: Այս գործը հարուցվել էր պատգամավոր Արման Բաբաջանյանի հաղորդման հիման վրա: