Ադրբեջանի նախագահ Իլհամ Ալիևը հայտարարել է, որ վերջին շրջանում Հայաստանի և Ադրբեջանի միջև սկսվել են որոշ առևտրային և քաղաքացիական շփումներ, որոնք, նրա խոսքով, նպաստում են հարաբերությունների կարգավորմանը
Սպիտակ տանը համատեղ հռչակագրի ստորագրումից ի վեր տեղի են ունեցել բազմաթիվ միջոցառումներ: Սկսվել են առևտրային հարաբերություններ, մասնավորապես՝ նավթամթերքի արտահանում Ադրբեջանից Հայաստան․ ինչպես գրում են ադրբեջանական լրատվամիջոցները, այդ մասին հայտարարել է Ադրբեջանի նախագահ Իլհամ Ալիևը՝ Ադրբեջանում պաշտոնական այցով գտնվող Լատվիայի նախագահ Էդգարս Ռինկևիչսի հետ մամուլի ասուլիսում:
Նշելով Ադրբեջանի և Հայաստանի քաղաքացիական հասարակության ներկայացուցիչների և լրատվամիջոցների միջև փոխադարձ այցելությունների և հանդիպումների մասին՝ Ալիևն ընդգծել է, որ դա նպաստում է իրավիճակի կարգավորմանը: