Մելադա Սարգսյանի վերաբերյալ նոր ահազանգեր․ քաղաքացիները պնդում են՝ իրենց ահաբեկում են
«Ամբիոն Նյուզ» լրատվական կայքը այսօր առավոտվանից բազմաթիվ ահազանգեր է ստանում քաղաքացիներից՝ Մելադա Սարգսյանի վերաբերյալ։
Մեր խմբագրություն դիմած քաղաքացիների պնդմամբ՝ Սարգսյանն իրենց զանգահարում է և սպառնալիքների ու ահաբեկման բնույթ ունեցող խոսակցություններ վարում։ Նրանցից մի քանիսը պատրաստակամություն են հայտնել անհրաժեշտության դեպքում իրենց հաղորդումները ներկայացնել իրավապահ մարմիններին։
Միաժամանակ հարց է առաջանում՝ ինչո՞ւ մինչ այս պահը քննիչը չի լսել Մելադա Սարգսյանին, եթե նրա վերաբերյալ արդեն իսկ քաղաքացիների կողմից ներկայացվել են դիմումներ և ահազանգեր։
Հիշեցնենք՝ քաղաքացիների դիմումները ՀՀ գլխավոր դատախազության կողմից ընթացք են ստացել և ուղարկվել Շիրակի մարզի դատախազություն։ Սակայն, քաղաքացիների փոխանցմամբ, մինչ օրս իրենց հայտնի չէ որևէ գործուն քայլի մասին։
«Ամբիոն Նյուզ»-ը սպասում է Շիրակի մարզի դատախազության և քննություն իրականացնող մարմնի պարզաբանմանը՝ դիմումների հիման վրա ի՞նչ գործողություններ են իրականացվել, արդյոք քաղաքացիների ահազանգերը ստուգվել են, և ինչո՞ւ Մելադա Սարգսյանը չի հրավիրվել հարցաքննության։
Միևնույն ժամանակ ընդգծում ենք՝ հրապարակված տեղեկությունները ներկայացվում են որպես քաղաքացիների ահազանգեր և պնդումներ, իսկ դրանց իրավական գնահատականը կարող են տալ բացառապես իրավասու մարմինները։