Կիևի քաղաքային խորհրդի պատգամավորները Զելենսկիին խնդրել են ազատել Կլիչկոյին իր երկրորդ պաշտոնից

Կիևի քաղաքային խորհրդի պատգամավորները դիմել են Ուկրաինայի նախագահ Վլադիմիր Զելենսկիին, ինչպես նաև երկրի վարչապետին և Վերին ռադայի խոսնակին՝ խնդրելով Կիևի քաղաքապետ Վիտալի Կլիչկոյին ազատել իր երկրորդ՝ Կիևի քաղաքային պետական վարչակազմի ղեկավարի պաշտոնից: Այդ մասին ֆեյսբուքյան էջում հայտնել է քաղաքային խորհրդի պատգամավոր Սերգեյ Գուսովսկին, հաղորդում է Известия-ն:

Աղբյուրի փոխանցմամբ՝ պատգամավորները նախագահին խնդրել են միջոցներ ձեռնարկել Կիևի վարչակազմում կոռուպցիոն դրսևորումները վերացնելու ուղղությամբ, ինչպես նաև դիտարկել գործող խորհրդի լուծարման և արտահերթ ընտրությունների անցկացման հնարավորությունը:

Նշենք, որ հոկտեմբերի 3-ին Ուկրաինայի խորհրդարանն առաջին ընթերցմամբ ընդունել է օրինագիծ, որով առաջարկվում է տարանջատել Կիևի քաղաքապետի և Կիևի քաղաքային պետական վարչակազմի ղեկավարի պաշտոնները: Նախագիծը դեռ պետք է ընդունվի նաև երկրորդ ընթերցմամբ: Կլիչկոն հայտարարել է, որ քաղաքի մասին օրինագիծը պետք է ստանա փորձագետների գնահատականը և դրվի հանրային քննարկման: