ՀՀ իշխանությունները չպետք է միջամտեն Արցախի նախագահական ընտրություններին, ԱՀ-ի ժողովուրդը քաղաքականապես հասուն է, իր ապագա իշխանության հարցն ինքը կլուծի. Վ. Աթանեսյան
Ես, միանշանակ, հայտարարում եմ՝ ՀՀ իշխանությունները չպետք է միջամտեն Արցախի նախագահական ընտրություններին: Tert.am-ի հետ զրույցում նման տեսակետ հայտնեց Արցախի խորհրդարանի նախկին պատգամավոր, քաղաքագետ Վահրամ Աթանեսյանը՝ անդրադառնալով այն հրապարակումներին, որ ՀՀ իշխանությունների համար ընդունելի թեկնածուն ԱՀ ԱԳՆ նախարար Մասիս Մայիլյանն է:
«Արցախի ժողովուրդը քաղաքականապես հասուն, կայացած, որոշումներ ընդունելու ունակ հանրություն է, և նա ինքը պետք է լուծի իր ապագա իշխանության հարցը, ինչպես դա սահմանված է Արցախի Սահմանադրության մեջ և Ընտրական օրենսգրքում»,-ասաց նա:
Ըստ Վահրամ Աթանեսյանի՝ բնական և նորմալ է, որ Արցախի նախագահ Բակո Սահակյանը որևէ թեկնածուի կամ քաղաքական ուժի սատարելու խնդիր չի դնում: «Շատ նորմալ է և ողջունելի, որովհետև նախագահը, չլինելով կուսակցական, ինչո՞ւ պետք է որևէ թեկնածուի աջակցի, ունի սահմանադրական լիազորություններ, կոչված է ապահովելու ընտրությունների ազատությունը, արդարացիությունը, թափանցիկությունը և մրցակցայնությունը, և Արցախի նախագահը փայլուն կատարում է սահմանադրական լիազորությունները»,-ասաց նա:
Քաղաքագետը չի կիսում այն տեսակետները, թե Արցախի և Հայաստանի իշխանությունների հարաբերությունները փայլուն չեն: Ինչ վերաբերում է ՀՀ իշխանությունների դեմ Արցախի հերոս Վիտալի Բալասանյանի հայտարարություններին, ապա Աթանեսյանը չի կարծում, որ Արցախում Վիտալի Բալասանյանի նման մտածողները շատ են:
«Նրա հայտարարություններն ուղղված են ՀՀ-ի քաղաքական ուժերին, Արցախում նման խնդիր գոյություն չունի, որ Արցախի հանրության մի շերտ ընդդիմադիր է հայաստանյան իշխանություններին: Նման քաղաքական իրողություն գոյություն չունի: Եվ ես Բալասանյանի հայտարարությունները չեմ կարող օրինաչափ համարել, ես պարզապես համոզված եմ, որ Արցախի նախագահի թեկնածուն պետք է խոսի Արցախի ներքին խնդիրների և ղարաբաղյան հարցի կարգավորման իր տեսլականի մասին, ոչ թե քննադատի ՀՀ իշխանություններին, այսինքն` դա նախագահի թեկնածուի այսպես ասած՝ քաղաքական պլատֆորմ չէ»,-ասաց նա:
Վահրամ Աթանեսյանը նշեց, որ հանրային կյանքը Արցախում հանգիստ է, նախընտրական վտանգավոր միտումներ այս պահի դրությամբ չկան: «Ես կարծում եմ՝ մինչև վերջ նախագահ Սահակյանին հաջողվելու է իրավիճակը պահել կառավարելիության և կայունության սահմաններում, և Արցախում տեղի են ունենալու Սահմանադրությամբ նախատեսված կարգով և ժամկետներում ազատ արդար ընտրություններ»,-ասաց նա:
Քաղաքագետը տեղեկացրեց, որ այս պահին կա ԱՀ նախագահի պաշտոնի 8 հավակնորդ, այդ թիվը կարող է փոփոխվել. «Թե ինչ խմորումներ են լինելու հետագայում, ինչ դասավորվածություն կարող է լինել հետագայում, այս պահին կանխատեսել դժվար է: Միայն ակնհայտ է մեկ իրողություն, որ Արցախի «Ազատ հայրենիք» կուսակցությունը սեպտեմբերի 8-ին ՏԻ մարմիններում շոշափելի հաջողության է հասել և քաղաքական լուրջ ռեսուրս ունի, մյուս ուժերի մասին ես կդժվարանայի կանխատեսումներ անել՝ թե՛ սոցիալական, թե՛ քաղաքական ինչ հենարանի վրա են կառուցելու իրենց հետագա քարոզչությունը, առաջադրվելու են, թե չեն առաջադրվելու:
Այս պահի դրությամբ պաշտոնապես ունենք 3 հայտարարություն. «Ազատ Հայրենիք» կուսակցությունն է հայտարարել նախագահի թեկնածուին առաջադրելու մասին, և ամենայն հավանականությամբ նա կառաջադրի նախկին վարչապետ Արայիկ Հարությունյանին, Վիտալի Բալասանյանն է միանշանակորեն հայտարարել, որ առաջադրվելու է, և հայտարարությամբ հանդես է եկել Արցախի ԱԳ նախարար Մասիս Մայիլյանը: Պաշտոնական հայտարարությունները սրանք են, մնացածները հանդես են գալիս իրենց մասնակցությունը չբացառող հայտարարություններով, որը դեռևս ընտրություններին լիարժեք մասնակցության հայտ ես չեմ կարող դիտարկել»,-ասաց նա:
Հարցին, թե ինչպես է վերաբերվում Արցախի ՀՅԴ կուսակցության նախաձեռնությանը՝ կոնսուլտացիաներ սկսել միասնական թեկնածուի խնդիր դնելու շուրջ, քաղաքագետը պատասխանեց՝ այդ մոտեցումը չի կիսում. «Ավելին ասեմ՝ ՀՅԴ-ի մտահոգությունն, իմ տպավորությամբ, պայմանավորված է նրանով, որ ՀՅԴ-ն առանձին որպես քաղաքական ուժ խորհրդարանական ընտրությունների 5 տոկոսի շեմը հաղթահարելու խնդիր ունի, և միասնական թեկնածուի փնտրտուքը և այլ ուժերի հետ դաշինք կազմելու սցենարը ՀՅԴ-ն ծրագրել է այնպես, որպեսզի գոնե ապագա խորհրդարանում ներկայացված լինի: Այլ խնդիր ՀՅԴ-ն չի լուծում և չի էլ կարող լուծել»,-ասաց նա:
Ինչ վերաբերում է միասնական թեկնածուի գաղափարին, ասաց որ այսօր ժամանակները բոլորովին այլ են: «Այդ միասնական թեկնածուն ո՞ւմ հետ պետք է մրցակցի, տրամաբանությունը ո՞րն է, եթե գտնում ենք, որ ահա այս թեկնածուն հակաժողովրդավարական միասնական ֆիգուրա է, իսկ այն մյուսը, որ այդ դասավորությունից դուրս է մնացել, ի՞նչ է, քաղաքական հակառակո՞րդ է, օտա՞ր է, թե՞ այլմոլորակային: Ի՞նչ է նշանակում միասնական թեկնածուն, այսինքն՝ սոցիալիստական հայացքներ ունեցող Դաշնակցությունը, Արցախի պահպանողական կուսակցությունը, ժողովրդավարական արժեք դավանող Արցախի ժողովրդավարական կուսակցությունը կամ ասենք 3-րդ, 4-րդ այլ ուժեր ինչպե՞ս կարող են մշակել այլ պլատֆորմ, ո՞վ կարող է լինել այդ անձնավորությունը, որ կիսով չափ կարող է լինել դաշնակցական, կիսով պահպանողական, մի երրորդ մասով կլինի ժողովրդավար, ազատական գաղափարների կրող. ինչ-որ սինթեզ ենք ուզում ստեղծել, բայց այդ ժամանակներն անցել են»,-ասաց նա:
Աթանեսյանը կարծիք հայտնեց, որ Արցախի միասնական թեկնածուի մասին խոսելով ուզում են դրանով իսկ կանխորոշեն Արցախի ընտրությունների արդյունքները: «Այսինքն՝ եթե սա միասնական թեկնածու է, ապա նա պետք է անպայման հաղթի, այս տրամաբանությունն են ուզում դնել, իսկ դա էությամբ ոչ ժողովրդավարական մոտեցում է, և ես այդ տրամաբանությունը չեմ հասկանում»,-ասաց նա: