Մինչ Քելլիի հետ ծանոթանալը, Բրոսնանն ամուսնացած է եղել Կասանդրա Հարիսի հետ
Ջեյմս Բոնդի ամենահայտնի դերակատարներից Փիրս Բրոսնանը, ինչպես գրում են ամերիկյան լրատվամիջոցները, կատարյալ տղամարդ է: Նա ոչ միայն հիանալի դերասան է ու 65 տարեկանում էլ արտակարգ տեսք ունի, նաեւ հիանալի ամուսին ու հայր է: Այսօր ներկայացնելու ենք Հոլիվուդի ամենակայուն ընտանեկան զույգերից մեկի՝ Բրոսնանի ու Քելլի Շեյ Սմիթի գեղեցիկ սիրո պատմությունը:
Առաջին ամուսնությունը
Մինչ Քելլիի հետ ծանոթանալը, Բրոսնանն ամուսնացած է եղել Կասանդրա Հարիսի հետ: Դերասանը որդեգրել է նրա երկու որդիներին, շուտով նաեւ իրենք են երեխա ունեցել: 80-ականների սկզբին Կասանդրային քաղցկեղ ախտորոշեցին, Բրոսնանը մի քանի տարի շարունակ կնոջ հետ պայքարեց նրա կյանքի համար, բայց, ցավոք, փրկել չհաջողվեց:
«Կասանդրան է ինձ համատեղ կյանքի 11 տարիների ընթացում դարձրել հենց այն տղամարդն ու դերասանը, ինչպիսին կամ: Նա դարերով կմնա իմ էության ամեն մասնիկում: Սակայն հիանալի անցյալով ապրել չի կարող ոչ մի կենդանի էակ: Դա իմ կյանքի ամենասարսափելի կորուստն էր»,- զրույցներից մեկում խոստովանել է նա:
Կնոջ մահը ծանր հարված է եղել դերասանի համար, նա ամբողջությամբ տրվել է աշխատանքին՝ փորձելով երեխաներին ցույց չտալ, թե որքան կոտրված է:
Ծանոթությունը
Բրոսնանին այդ վիճակից հանել է հենց Քելլի Շեյ Սմիթը: Նրանք ծանոթացել են 1994 թվականին՝ Մեքսիկայում: Դերասանի սիրտը սկսել է թրթռալ, երբ նրան է մոտեցել գեղեցիկ լրագրողուհին, որը պատկերացում էլ չի ունեցել, թե ինչի կհանգեցնի այդ հարցազրույցը: Նա հատուկ էր ժամանել այդ փակ միջոցառմանը, որպեսզի բացառիկ զրույց ունենա Բրոսնանի հետ:
Ականատեսները պատմում են, որ նրանց միջեւ միանգամից կայծ է առաջացել, որը չնկատելն անհնար էր: «Նա արտակարգ էր՝ բարձրահասակ, թխահեր, գեղեցիկ ու աչքերի այնպիսի փայլով, որ միայն կարող էի մտածել. «Այ քեզ բան»»,- պատմել է Քելլին:
«Որտեղ էլ մեկնեի, նրան անչափ շատ էի կարոտում: Նրան տոմսեր էի ուղարկում, որպեսզի միանա ինձ, ու նորից մասին լինենք»,- սրանք էլ Բրոսնանի խոսքերն են:
Նրանք սկսել են հաճախ խոսել հեռախոսով, քայլել գիշերային քաղաքով, ընթրել ռեստորաններում ու միասին հանգստի մեկնել: Քելլին փորձել է որոշակի հեռավորություն պահել, քանի որ դեռ պատրաստ չէր լուրջ հարաբերությունների, բայց իրենց կապը վերաճել է իսկական լուրջ սիրավեպի:
Զրույցներից մեկում Բրոսնանը խոստովանել է, որ հենց Քելլին է իրեն օգնել հաղթահարել դեպրեսիան. «Սուգը չի կարող մի քանի տարի տեւել: Անընդհատ մտածում էի Կասանդրայի մասին, իսկ Քելլին անասելի կարեկցանք ու ըմբռնում ցուցաբերեց, որի կարիքն այդքան ունեի: Նա ինձ թույլ էր տալիս սգալ այդ կորուստն ու ինձ համար բեւեռային աստղ դարձավ: Բախտս բերել է, որ Քելլիին հանդիպեցի. ինձ արդեն սկսել էր թվալ, որ էլ չեմ գտնի երկրորդ կեսիս»:
Ամուսնությունը
Մեքսիկայից վերադառնալուց հետո նա սկսել է նկարահանվել Ջեյմս Բոնդի մասին պատմող ֆիլմում, Քելլին նույնպես կենտրոնացել է իր աշխատանքի վրա: Նա չէր էլ մտածում հավակնել Բոնդի ընկերուհու կարգավիճակին իրական կյանքում, առավել եւս՝ դառնալ տիկին Բրոսնան: Իրեն զուսպ էր պահում հարաբերություններում՝ չնայած առաջացած որոշակի մտերմությանը:





