ՄԻՊ աշխատակազմը ԱԱԾ-ի հետ քննարկել է Հրայր Թովմասյանի հորն ու դուստրերին ԱԱԾ հրավիրելու և նրանց իրավունքների հետ կապված հարցեր
Մարդու իրավունքների պաշտպանի աշխատակազմը Ազգային անվտանգության ծառայության հետ երեկ քննարկել է Հրայր Թովմասյանի հորը, դուստրերին ԱԱԾ հրավիրելու և նրանց իրավունքների հետ կապված հարցեր։ Այս մասին Tert.am-ին հայտնում են ՄԻՊ-ի մամուլի ծառայությունից` նշելով նաև, որ պաշտպանի աշխատակազմն ուշադրության ներքո է պահում թեմայի հետ կապված հարցերը։
Հիշեցնենք, որ ՀՀ ԱԺ պատգամավոր Արման Բաբաջանյանի կողմից Հրայր Թովմասյանի` ՍԴ դատավոր ընտրվելու գործընթացի վերաբերյալ ՀՀ գլխավոր դատախազին ներկայացված հաղորդման հիման վրա ՀՔԾ-ն քրեական գործ է հարուցել, կատարվում է նախաքննություն:
Հիշեցնենք նաև, որ երեկ երեկոյան Հրայր Թովմասյանի հոր`Վարդան Թովմասյանի` Դարակերտ համայնքում գտնվող առանձնատուն էին այցելել Ազգային անվտանգության ծառայության քննիչները, իսկ այսօր 14:30-ին ՍԴ նախագահի հայրն ու դուստրերը հրավիրվել են ԱԱԾ` հարցաքննության:
ՍԴ նախագահ Հրայր Թովմասյանի հայրը ԱԱԾ աշխատակիցների՝ իր տնից հեռանալուց հետո լրագրողների հետ զրույցում ասել էր, որ հարցաքննություն չի եղել, միայն հետաքրքրվել են, թե տան տանիքը երբ և ինչ միջոցներով է վերանորոգվել: