<<Թուրքիայի ոչ պատշաճ վարքի դեպքում մենք պատժամիջոցներ կկիրառենք>>. Թրամփ
ԱՄՆ նախագահ Դոնալդ Թրամփը Սպիտակ տանը կայանալիք նիստից առաջ հայտարարել է, որ Սիրիայում հրադադարը կշարունակվի: Այս մասին տեղեկացնում է Haberler.com կայքը:
Ըստ նրա՝ հնարավոր են միայն փոքր բախումներ թուրքերի և քրդերի միջև, բայց անգամ դրանք շատ փոքրաթիվ կլինեն:
Թրամփը սպառնացել է Թուրքիայի նկատմամբ պատժամիջոցներ սահմանել և բարձրացնել մաքսատուրքերը, եթե նա իրեն ոչ պատշաճ դրսևորի: ԱՄՆ նախագահն այս մասին հայտնել էր նաև Թուրքիայի կողմից Սիրիայի հյուսիս-արևելքում անցկացվող «Խաղաղության ակունք» ռազմական գործողության շուրջ ձեռք բերված հրադադարից առաջ:
ԱՄՆ նախագահը նշել է նաև, որ Սիրիայի քրդական «Ազգային ինքնապաշտպանության ջոկատները» (YPG) դուրս են եկել Սիրիայի հյուսիս-արևելյան շրջաններից:
Թրամփն ընդգծել է, որ իրենք քրդերին չէին խոստացել 400 տարի մնալ տարածաշրջանում, և զորքերը դուրս հանելու որոշումը ճիշտ և խելացի որոշում էր:
Հիշեցնենք, որ հոկտեմբերի 17-ին Թուրքիայի նախագահ Ռեջեփ Թայիփ Էրդողանի, ԱՄՆ փոխնախագահ Մայք Փենսի և ԱՄՆ պետքարտուղար Մայք Պոմպեոյի բանակցությունների արդյունքում Թուրքիան պարտավորվել է 120 ժամով դադարեցնել իր գործողությունները, որպեսզի քրդական ջոկատները հեռանան 30 կմ-անոց «անվտանգության գոտուց»: