<<Հրապարակ>>. ԱԺ ընդհանուր բաժնի արդեն նախկին պետը պնդում է, որ ՍԴ գրության վերաբերյալ Արսեն Բաբայանից որևէ հրահանգ չի ստացել
«Հրապարակ»-ը գրել է, որ ԱԺ աշխատակազմի ղեկավարի նախկին տեղակալ Արսեն Բաբայանին առաջադրված մեղադրանքը վերաբերում է նրան, որ Գագիկ Հարությունյանի հրաժարականի դիմումը, որը ստացվել է 2018 թվականի մարտի 2-ին, աշխատանքային օրվա ավարտին ԱԺ ընդհանուր բաժնի արդեն նախկին պետը՝ Ռուզաննա Արզումանյանը, անմիջապես չի գրանցել համակարգում, այլ արել է երկուշաբթի օրը՝ մարտի 5-ին։ Եվ այդ եռօրյա ժամկետը ՀՔԾ-ն գնահատել է որպես խախտում ու այդ հիմքով նախ ցուցմունք է կորզել Արզումանյանից, որ նա գործել է Արսեն Բաբայանի ցուցումով, ապա մեղադրանք է առաջադրել Բաբայանին։
«Ռուզաննա Արզումանյանն ամիսներ առաջ կենսաթոշակի է գնացել և այլևս չի աշխատում ԱԺ-ում։ Իսկ ինչո՞ւ է հենց Արսեն Բաբայանի դեմ ցուցմունք տվել, այլ ոչ թե, ասենք, Արա Սաղաթելյանի՝ ԱԺ աշխատակազմի ղեկավարի։ Բանն այն է, որ ընդհանուր բաժինը գործել է ոչ թե ԱԺ աշխատակազմի ղեկավարի, այլ տեղակալի կուրացիայի տակ։
Ի դեպ, Արզումանյանի հետ երկար տարիներ աշխատած մեր զրուցակիցները պատմեցին, որ տիկինը մշտապես աչքի է ընկել իր «դնջությամբ» և հաճախ է ուշացրել կարևոր գրությունները»,-գրել է թերթը։
Թերթը hավելել է, որ չնայած այն փաստին, որ Ռուզաննա Արզումանյանին տեսել էին Հատուկ քննչական ծառայությունում և վստահ են, որ հենց նա է ցուցմունք տվել Արսեն Բաբայանի դեմ՝ նպաստելով վերջինիս ձերբակալությանը, նա թերթի հետ զրույցում կտրականապես հերքել է գործող իշխանությունների հետ իր համագործակցության մասին լուրերը։
Արզումանյանի հետ «Հրապարակ»-ի հարցազրույցը՝ ստորև.
-Տիկին Արզումանյան, տեղյակ եք, որ ՀՔԾ-ում գործ է հարուցվել, և այդ շրջանակներում նախօրեին ձերբակալել են Ձեր նախկին վերադաս Արսեն Բաբայանին։
-Ոչ, տեղյակ չեմ, ես թոշակի մեջ եմ և ոչ մի բանից տեղյակ չեմ։
-Մինչդեռ կան տեղեկություններ, որ Դուք «աջակցել» եք իրավապահներին․ որևէ բացատրություն կամ ցուցմունք տվե՞լ եք ՀՔԾ-ում․․․
-Որևէ, որևէ բանից տեղեկություն չունեմ, ես թոշակի եմ անցել, որևէ տեղեկություն չունեմ, ես լսեցի, նայեցի հեռուստացույցով և հեռուստացույցից եմ իմացել։
–Դուք Բաբայանի դեմ ցուցմունք չե՞ք տվել, որ նա է Ձեզ պարտադրել փոխել Գագիկ Հարությունյանի դիմումի ամսաթիվը գրել, որ հետին թվով եք մուտք արել ԱԺ ընդհանուր բաժին։
-Դուք բառեր եք ասում, որ ես պնդում եմ՝ որևէ տեղեկություն չունեմ այդ բանի առիթով։
-Ձեզ չե՞ն հարցաքննել։
– Ոչ, ոչ։
–Դուք բացատրություն չե՞ք ներկայացրել նշածս փաստով։
-Որևէ տեղեկություն չունեմ այդ գործից։
– Բայց գրե՞լ եք բացատրություն։
-Ոչ։
–Իսկ որևէ մեկին պատմե՞լ եք, որ, իբր, Արսեն Բաբայանը Ձեզ պարտադրել է։
– Ոչ, ոչ և ոչ։
-Իսկ հնարավո՞ր է, որ ինչ-որ մեկը Ձեր անունից այդ տեղեկությունը տար։
-Ոչ, բոլորովին, ո՞վ պետք է գրած լինի, ում ուզում եք՝ գնացեք հարցրեք։
–Տարօրինակ է, որ չեք հիշում՝ այդ դիմումի հետ կապված խնդիրներ ծագե՞լ էին, թե ոչ։
-Չեմ հիշում․ ես ինչքան ժամանակ է՝ թոշակի մեջ եմ։
Նյութն ամբողջությամբ կարդացեք թերթի այսօրվա համարում: