Գյումրու քաղաքապետարանի աշխատակիցները և ավագանու անդամները հարգանքի տուրք մատուցեցին Հայոց ցեղասպանության անմեղ զոհերի հիշատակին
Գյումրու քաղաքապետարանի աշխատակիցները և ավագանու անդամները հարգանքի տուրք մատուցեցին Հայոց ցեղասպանության անմեղ զոհերի հիշատակին
Այսօր՝ Հայոց ցեղասպանության զոհերի հիշատակի օրը, Գյումրու քաղաքապետարանի աշխատակազմը, ավագանու անդամներն ու համայնքային ենթակայության հաստատությունների ներկայացուցիչները հարգանքի տուրք մատուցեցին Մեծ եղեռնի անմեղ նահատակների հիշատակին։
Հերհերի ձոր (Ջարդի ձոր)
Գյումրու քաղաքապետին փոխարինող Ավետիս Առաքելյանի, քաղաքապետարանի աշխատակազմի քարտուղար Կարեն Մալխասյանի և ավագանու «Հայաստանի Կոմունիստական կուսակցություն» խմբակցության քարտուղար Լուսինե Անանյանի գլխավորությամբ ծաղիկներ խոնարհվեցին Ջաջուռ գյուղից 3 կմ հեռավորության վրա գտնվող Հերհերի ձորում, որն ավելի հայտնի է Ջարդի ձոր անվամբ։
Այս վայրը պատմական առանձնահատուկ նշանակություն ունի. այստեղ կանգնեցված հուշարձանը հավերժացնում է 1915-1920 թվականներին թուրքական ներխուժումների ժամանակ սրի քաշված ավելի քան 12․000 շիրակցիների և լոռեցիների հիշատակը։ 111 տարի է անցել 20-րդ դարի առաջին ոճրագործությունից։ Շիրակի և Լոռու մարզերից հազարավոր մարդիկ շարունակում են ուխտի գալ այստեղ՝ վերահաստատելու իրենց պահանջատիրությունը։
Ավետիս Առաքելյանն իր խոսքում ընդգծեց.
«Մեր ուղերձը մեկն է՝ հիշում ենք և պահանջում արդարության վերականգնում։ Այս բարբարոսությունը, որն իրականացվեց մեր ազգի հանդեպ, հետևանք էր մեր ինքնության ու քրիստոնեական հավատքի։ Թող լույսերի մեջ հանգչեն մեր անմեղ նահատակները։ Մեր ազգն այսօր պետք է լինի առավել քան միասնական և միշտ հանդես գա պահանջատիրոջ դիրքերից։ Վստահ եմ՝ օրերից մի օր պատմական արդարությունը կհաղթանակի»։
Ջարդի ձորի հուշակոթողի մոտ ծաղկեպսակ էր դրվել նաև Գյումրու քաղաքապետ Վարդան Ղուկասյանի անունից։
Բացի Հերհերի ձորից, Վարդան Ղուկասյանի անունից ծաղկեզամբյուղներ խոնարհվեցին նաև Գյումրու Բագրատունյաց օղակում գտնվող «Վերածնունդ» հուշակոթողի մոտ։ Քանդակագործ Ֆրիդ Սողոյանի հեղինակած այս հուշարձանը, որը խորհրդանշում է հայ ժողովրդի անկոտրում կամքն ու վերածնվելու կարողությունը, ապրիլի 24-ին դարձյալ դարձել է գյումրեցիների բազմամարդ այցելությունների կենտրոն։
#Գյումրի #Ապրիլ24 #ՀայոցՑեղասպանություն #ՀիշումԵնքևՊահանջում #ՋարդիՁոր #Վերածնունդ #Շիրակ