Սահմանադրությունը փոխելու պահանջը՝ խոչընդոտ պայմանագրի ճանապարհին. ԱՄՆ զեկույցն ու արձագանքները

Միացյալ Նահանգների հետախուզական ծառայությունը հրապարակած տարեկան զեկույցում արձանագրել է` Հայաստանի և Ադրբեջանի միջև խաղաղության վերջնական համաձայնագրի կնքման ճանապարհին դեռ կան խոչընդոտներ՝ ուղիղ մեջբերելով Սահմանադրությունը փոխելու՝ Ադրբեջանի պահանջը, փոխանցում է «Ազատություն»-ը։

«Նախագահ Ալիևը շարունակում է պնդել, որ Հայաստանը պետք է փոփոխի Սահմանադրությունը՝ հեռացնելու հղումը, որը, նրա խոսքով, ենթադրում է, թե Լեռնային Ղարաբաղը Հայաստանի մաս է։ Դա կպահանջի սահմանադրական հանրաքվե Հայաստանում, որի ընդունումը երաշխավորված չէ», – ասված է զեկույցում:

Ադրբեջանի նախագահը Հայաստանի Սահմանադրության մեջ Անկախության հռչակագրին հղումը չի ուզում տեսնել:

ԱԺ ընդդիմադիր «Հայաստան» խմբակցության պատգամավոր Քրիստինե Վարդանյանը այս ձևակերպումներից եզրահանգել է՝ ԱՄՆ-ն ուղիղ ասում է՝ Հայաստանի իշխանությունը Սահմանադրության փոփոխության Իլհամ Ալիևի պահանջով է գնում. «Սևով սպիտակի վրա գրված է, մեկնաբանությունների տեղ չի թողնում։ Փաստորեն ամբողջ աշխարհը ֆիքսել է, որ Ալիևի պահանջով է, միայն Փաշինյանը հուսահատ ջանքեր է գործադրում սեփական ժողովրդին համոզելու, որ ոչ, լրիվ պատահականություն է, որ մենք Սահմանադրության փոփոխության մասին, ոչ թե բարեփոխումների մասին սկսեցինք խոսել այն բանից հետո, երբ դրա պահանջը հնչեցրեց Ալիևը։ Հիմա տեքստ էլ կհրապարակեն, ու կտեսնենք, որ շատ պատահականորեն լրիվ այն պահանջները, որոնք ունի Ալիևը, չկան, առաջարկում է Հայաստանը, որ հանեն։ Ներքին գործերի միջամտությունն էլ ո՞նց է լինում, ու ինքնիշխանության սահմանափակումը ո՞նց է լինում»։