Չարլի Քըրքի հոգեհանգստի ժամանակ ձերբակալվել է զինված տղամարդ, որը ներկայացել է որպես ոստիկան
Զինված տղամարդ է ձերբակալվել ուրբաթ օրը Արիզոնայի մարզադաշտի տարածքից դուրս՝ պահպանողական ակտիվիստ Չարլի Քըրքի հիշատակի արարողության վայրում, հայտնում է CBS News-ը։
ԱՄՆ Գաղտնի ծառայությունը CBS News-ին հայտնել է, որ Արիզոնայի Գլենդեյլ քաղաքում գտնվող State Farm մարզադաշտում կասկածելի վարքագծով տղամարդ է նկատվել։ Գաղտնի ծառայության գործակալները մոտեցել են նրան, և տղամարդը հայտարարել է, թե իրավապահ մարմնի աշխատակից է և զինված է։
Արիզոնայի հանրային անվտանգության վարչությունը հայտնել է, որ տղամարդը, որը ներկայացել է որպես Ջոշուա Ռանկլզ, իրականում իրավապահ մարմնի աշխատակից չի եղել։
Պաշտոնյաների վկայությամբ, 42-ամյա Ռանկլզը տեղափոխվել է Մարիկոպայի շրջանային բանտ՝ իրեն իրավապահ ներկայացնելու և արգելված վայրում զենք պահելու համար։ Ըստ վարչության, նրան հետագայում ազատ են արձակել գրավի դիմաց։
Իրավապահ մարմինների երկու աղբյուր CBS News-ին հայտնել են, որ Ռանկլզը աշխատել է որպես մասնավոր թիկնապահ՝ ազդեցիկ անձի մոտ, որը ներկա է եղել կիրակնօրյա հիշատակի արարողությանը։
Ռանկլզը հայտարարել է, թե համագործակցում է Գաղտնի ծառայության հետ, երբ բախվել է իրավապահների հետ։ Աղբյուրների վկայությամբ, նա ներկայացրել է փաստաթղթեր, որոնցում նշված է եղել որպես մեկ այլ քաղաքի շերիֆի տեղակալ։
«ԱՄՆ Գաղտնի ծառայությունը և տեղական իրավապահ մարմինները հետաքննում են, թե ինչ հանգամանքներում է նա հայտնվել այդ վայրում», – ասվում է գերատեսչության հայտարարության մեջ։