Մակրոնն ու Թրամփը խոսել են Սիրիայում թուրքական բանակի ռազմական գործողությունները դադարեցնելու անհրաժեշտության մասին
Ֆրանսիայի և ԱՄՆ-ի նախագահներ Էմանուել Մակրոնն ու Դոնալդ Թրամփը հեռախոսազրույց են ունեցել և խոսել են Սիրիայում թուրքական բանակի ռազմական գործողությունները դադարեցնելու անհրաժեշտության մասին: Տեղեկացնում է Reuters-ը:
«Ֆրանսիային և Միացյալ Նահանգներին անհանգստացնում է Սիրիայում տիրող իրավիճակը: Այդ առիթով Փարիզն ու Վաշինգտոնը մոտակա օրերին ակտիվորեն կբանակցեն»,- գրված է հայտարարությունում:
Ֆրանսիայի նախագահը շեշտել է, որ անհրաժեշտ է կանխել «Իսլամական պետություն» ահաբեկչական խմբավորման վերածնունդը տարածաշրջանում, ինչպես նաև պաշտպանել խաղաղ բնակիչներին:
Հիշեցնենք, որ հոկտեմբերի 9-ին Թուրքիան հայտարարել է Սիրիայում ռազմական գործողության մեկնարկի մասին, որի արդյունքում երկիրն արդեն հարվածներ է հասցրել սիրիական Թել Աբյադ, Ռաս էլ Այն քաղաքներին և այլ բնակավայրերի: Այս գործողությունը դատապարտել են աշխարհի բազմաթիվ երկրներ, այդ թվում՝ Հայաստանը:
