Իրականում Ադրբեջանը ձևացնում է, թե բանակցում է, բայց բանակցությունների քողի տակ տանում է ընդամենը քարոզչություն, իրականացնում է քարոզչական պատերազմ. Շ. Քոչարյան
Ստեփանակերտում ընթացող «Համագործակցություն հանուն արդարության և խաղաղության» խորագրով Արցախի բարեկամների համաժողովի ընթացքում Հայաստանի Հանրապետության արտաքին գործերի նախարարի տեղակալ Շավարշ Քոչարյանը հարցադրումներ արեց.
«Ինչու տարիներ շարունակ ընթացող բանակցային գործընթացում այդպիսի բարձր միջնորդությամբ առաջընթաց չի երևում, միջնորդները ՄԱԿ-ի անվտանգության խորհրդի երեք մշտական անդամ-պետություններն են, որևէ այլ հակամարտությունում այդպիսի բարձր մակարդակի միջնորդություն չկա»:
Նա հարցադրում է անում նաև, թե ինչու Արցախի ժողովրդի անթերի իրացրած ինքնորոշման իրավունքը վերածվեց արյունալի հակամարտության: «Իրականում մենք բանակցային գործընթացից ունենք մեկ արդյունք, որը ժողովուրդները զգացին իրենց մաշկի վրա. դա 94 թվականի ռազմական գործողությունների և կրակի դադարեցման մասին համաձայնագիրն էր»,-ասաց նա և հիշեցրեց, որ 94 թվականի մայիսին ուղղակի բանակցություններով Արցախի և Ադրբեջանի միջև նախապատրաստվեց այդ համաձայնագիրը, որին միացավ նաև Հայաստանը:
«Այսինքն՝ մենք կարող ենք արձանագրել, որ առնվազն Ադրբեջանն ընդունել է Արցախը որպես հակամարտության կողմ, նրա հետ բանակցել է, և դրա շնորհիվ է՝ մենք ունեցանք այն արդյունքը, որը ժողովուրդները իրենց մաշկի վրա զգացել են: Իսկ քանի դեռ Ադրբեջանը խուսափում է ուղղակի բանակցություններից Արցախի հետ, ավելին՝ ձևացնում է, որ այդպիսի սուբյեկտ չկա, ուրեմն ինքը բանակցություններում որևէ առաջընթաց չի ցանկանում»,-ասաց նա:
Շավարշ Քոչարյանը նշեց, որ խնդիրն այն է, որ առանց Արցախի հնարավոր չէ որևէ առաջընթաց բանակցություններում: «Որևէ մեկը լիազորված չէ Արցախի փոխարեն խոսել այն հարցերի մասին, որոնք բացառապես գտնվում են Արցախի տիրույթում, դա կարգավիճակն է, Արցախի տարածքային ամբողջականության խնդիրն է»,-ասաց նա և նկատեց, որ նույնիսկ Արցախի իշխանություններն են կաշկանդված ժողովրդի հանրաքվեով:
«Իրականում Ադրբեջանը ձևացնում է, թե բանակցում է և բանակցությունների քողի տակ տանում է ընդամենը քարոզչություն, իրականացնում է քարոզչական պատերազմ, որի նպատակն այն է, որ միջազգային հանրությանը հրամցնի, որ ոչ թե ինքնորոշման իրավունք է, այլ տարածքային վեճ է Հայաստանի և Ադրբեջանի միջև, այնինչ փաստերը հակառակն են ասում»,-նշեց նա:
Այսպիսով՝ ըստ ՀՀ ԱԳ փոխնախարարի` ինքնորոշման իրավունքը վերածվեց այդպիսի արյունալի հակամարտության, որովհետև Ադրբեջանը չի ցանկանում առաջընթաց, չի ցանկանում բանակցել և փորձում է ուժով հարցերը լուծել:
«Մի կողմից հայկական կողմն ասում է ինքնորոշում, մյուս կողմից Ադրբեջանն ասում է տարածքային ամբողջականություն, արձանագրենք, որ միջազգային իրավունքը թույլ չի տալիս հակադրել տարածքային ամբողջականությունը ինքնորոշման իրավունքի դեմ»,-ասաց նա:
