Ղազախստանը չի նախատեսում մտնել միութենական պետություն. Տոկաեւի մամուլի քարտուղար

Ղազախստանի մտադիր չէ եւ չի նախատեսում ստեղծել կամ մտնել որեւէ միութենական պետության մեջ։ Այս մասին ասել է հանրապետության նախագահի մամուլի քարտուղար Ռուսլան Ժելդիբայը, տեղեկացրել է «ՌԻԱ Նովոստի»-ն։

Ղազախստանի նախագահ Կասիմ-Ժոմարտ Տոկաեւը մայիսի 25-ին Մոսկվայում մասնակցել է Եվրասիական բարձրագույն տնտեսական խորհրդի լիագումար նիստին։ Պետության ղեկավարն այդ ժամանակ հայտարարել է Եվրասիական տնտեսական միության շրջանակում ինտեգրման տարբեր մակարդակների առկայության մասին՝ ուշադրություն դարձնելով Միութենական պետության միավորման մեջ Ռուսաստանի եւ Բելառուսի ներկայությանը։

Նրա խոսքով՝ իսկապես, այսօր ԵԱՏՄ երկու մասնակիցներ՝ Ռուսաստանը եւ Բելառուսը, համագործակցության ավելի սերտ եւ ավելի բարձր մակարդակ են ցուցադրում։

«Սա ինքնատիպ նախադեպ է։ Ինչպես նշել է պետության ղեկավարը, ըստ էության, խոսքը մեկ ժողովրդի եւ պետության մասին է։ Եվ այս առումով շատ կարեւոր է կիսել նախաձեռնություններն ինտեգրացիոն երկու նախագծերի շրջանակում, որոնք միանգամայն տարբեր նպատակներ ունեն»,- ասել է նա։

Ժելդիբայը նշել է, որ «պետության ղեկավարի հիմնական մեսիջն այն է, որ ինտեգրումը ԵԱՏՄ շրջանակում կարող է եւ պետք է ընթանա բացառապես տնտեսական ուղղությամբ»։

«Դրա շրջանակից դուրս գալը խախտում է կազմակերպության կանոնադրական փաստաթղթերի նպատակները, սկզբունքները եւ խնդիրները։ Ինչպես ընդգծել է նախագահը, տնտեսական ինտեգրումն ինքնանպատակ չէ, այլ տնտեսությունների զարգացման եւ մեր ժողովուրդների բարեկեցության բարձրացման միջոցներից մեկը։ Այսինքն՝ յուրաքանչյուր որոշում, որը կընդունվի միավորման շրջանակում, պետք է արդյունք բերի առանձին վերցրած յուրաքանչյուր մասնակցին եւ, նախ եւ առաջ,  ԵԱՏՄ բոլոր պետտությունների քաղաքացիներին»,- ընդգծել է Տոկաեւի մամուլի քարտուղարը։

Share This