Վարունգի տարայի չափազանց ամուր կափարիչն ամուսնալուծության պատճառ է դարձել

Թթու վարունգի տարան դարձել է ամուսնալուծության պատճառ։ Կինը որոշել է բաժանվել ամուսնուց, քանի որ վերջինը «դիտավորյալ» շատ ամուր է փակել տարաների կափարիչները։ Վրդովված կինն իր պատմությամբ կիսվել է Reddit-ում:

«Երբեմն ես ինձ բառացիորեն խենթ եմ զգում, քանի որ վրդովվում եմ տարաների կափարիչների պատճառով»,-բացատրել է կինը: Նրա խոսքով՝ դա տեղի է ունենում այն ​​պահից, ինչ իրենք սկսել են հանդիպել։ «Վերջին 5 տարիների ընթացքում սա անընդհատ կրկնվում է, եւ իրավիճակն այն աստիճան է սրվել, որ ես նյարդային ցնցում եմ ապրել: Կարծում եմ, որ ես խելագարվում եմ, քանի որ սա, պարզապես, կափարիչ է, սակայն դրա պատճառով ես ինձ ավելի ու ավելի վատ եմ զգում»,-շարունակել է նա:

Նրա ամուսինը պնդում էր, որ ինքը չափազանց ամուր է փակում կափարիչները՝ «սնունդը թարմ պահելու համար»: Սակայն կնոջ՝ առանց նրա օգնության տարան բացելու անկարողությունը նրանց հարաբերություններում բախում է առաջացրել։ «Նա այնքան ամուր է փակում դրանք, որ ես չեմ կարողանում բացել առանց նրա օգնության: Դա ինձ իսկապես նյարդայնացրել է»:

Երբ ամուսինը տանը կամ քաղաքում չէր, հարեւանն էր օգնում նրան բացել տարաները։ Որոշ ժամանակ անց վերջինը նույնպես եկել է այն եզրակացության, որ կնոջ ամուսինը միտումնավոր է պինդ փակում տարաները, որպեսզի դրանք չկարողանան բացել։

Հարցն ավելի է սրվել այն բանից հետո, երբ ամուսինը 10 օրով նրան թողել է տանը։ Արդյունքում կինը որոշել է, որ այլեւս չի կարող ապրել նրա հետ եւ դիմել է ամուսնալուծության։ «Նա չի էլ խոստովանի, որ դա միտումնավոր է արել»,-ասել է նա: «Ահա, թե ինչպես է դասավորվել իմ կյանքը: Ես ամուսնալուծվում եմ, քանի որ իմ կծու պղպեղի մածուկի տարայի կափարիչը չափազանց ամուր էր»,-եզրափակել է նա՝ խնդրելով Reddit-ի մյուս օգտատերերին կշռադատել իր որոշումը:

Բազմաթիվ օգտատերեր աջակցել են նրա ամուսնալուծության որոշմանը՝ համաձայնելով, որ նրա ուժեղ ամուսինը դա արել է միտումնավոր։