Եթե խնամի-ծանոթ սկզբունքը գործեր, ապա տպարան կունենայի և վարչապետի կարգախոսի տարածման համար ծախսված 100 հազ. դոլարն իմ գրպանը կգնար. Հրաչյա Հակոբյան (տեսանյութ)
Վստահեցնում եմ վարչապետ Նիկոլ Փաշինյանը բյուջեի հաշվին անտեղի ծախսեր, շռայլություններ չի կատարում: Այս մասին Tert.am-ի հետ զրույցում ասաց ԱԺ «Իմ քայլը» խմբակցության պատգամավոր Հրաչյա Հակոբյանը՝ անդրադառնալով քննադատություններին, որ Նիկոլ Փաշինյանը ճոխություններ է թույլ տալիս իրեն. պետական բյուջեից 1 մլն դոլար է ծախսում իր ու իր ընտանիքին նոր ավտոմեքենա գնելու համար, 2 մլն դոլար է ծախսում կառավարական իր առանձնատունը վերանորոգելու և ևս 350 հազար դոլար՝ անձնական չարթերով ԱՄՆ մեկնելու համար:
«Ես այդ բակ (կառավարական առանձնատուն – Tert.am) գնում եմ, այնտեղ ամբողջ այդ տարածքի համար ասֆալտապատում է իրականացվում, այնտեղ հին շենք կա, դա է վերանորոգվում: Բայց 2 մլն դոլար թիվը որտեղի՞ց եք վերցրել, որևէ տեղ պաշտոնապես հրապարկվե՞լ է, որ Նիկոլ Փաշինյանի առանձնատան համար այդքան գումար է ծախսվել: Մեկ մլն դոլար մեքենայի համա՞ր. սա էլ կասկածելի թիվ է, մեր աղբյուրների պնդմամբ, բայց չեմ ճշտել, խոսում են, որ դա դեռևս Սերժ Սարգսյանի օրոք նախօրոք պատվիրված էր: Նորից ասեմ՝ ստույգ, վերջնական տվյալ չեմ փոխանցում ձեզ, բայց ասում եմ, որ այդպիսի խոսակցություն կա՝ Սերժ Սարգսյանի օրոք պատվիրված էր, գումարը փոխանցած էր, հիմա ի՞նչ աներ վարչապետ Նիկոլ Փաշինյանը: Այդ թվերն ուռճացված են»,- նշեց նա:
Հրաչյա Հակոբյանն ասաց, որ ԱՄՆ ուղևորության ժամանակ մասնավոր չվերթի համար 350 հազար դոլար վճարել են, քանի որ Նիկոլ Փաշինյանը պետք է հասցներ և՛ Անկախության միջոցառումներին մասնակցել, և՛ ԱՄՆ-ում նախատեսված հանդիպումներից չուշանալ:
Անդրադառնալով դիտարկմանը, որ չնայած նրան, որ նույն Նիկոլ Փաշինյանը, նրա թիմի ներկայացուցիչները խոսում են խնամի-ծանոթ-բարեկամ սկզբունքը մերժելու մասին, 100 հազար դոլար առանց մրցույթի հատկացվել է «Անտարես» հրատարակչությանը՝ Նիկոլ Փաշինյանի «Հայաստանն իմ տունն է, ժողովուրդն իմ ընտանիքը» կարգախոսը տարածելու համար, իսկ Իջևանի քաղաքապետի ժամանակավոր պաշտոնակատար նշանակվեց Նիկոլ Փաշինյանի կնքահայրը, Հրաչյա Հակոբյանն ասաց.
«Նիկոլ Փաշինյանին մեղադրում են, որ բյուջեն մսխում է, «էլ կաշառքը պոզով–պոչո՞վ է լինում» մեջբերումներով: Օրինակ՝ ամբողջ Հայաստանով մեկ այդ կարգախոսն է, չենք խոսում կարգախոսի բովանդակության՝ լավը վատը լինելու մասին. մեկին դուր կգա, մեկին՝ ոչ, համենայնդեպս կարգախոս է, դրա վրա է ծախսվել: Հիմա ինձ կասե՞ք այդտեղ կոռուպցիան որտեղ է, կաշառակերությունը որտեղ է, բյուջեն մսխելը որտեղ է: Ձեզ թվում է՝ Նիկոլ Փաշինյանն էդ կարգախոսը տեղադրելու համար ասել է՝ կգնաք, այսինչ մարդու մոտ կանե՞ք տպագրությունը: Կարող է Նիկոլ Փաշինյանն իր կարգախոսների փողոցում երևելու մասին իմացել է այն ժամանակ, երբ դրանք արդեն հայտնվել են»,- նկատեց նա՝ հավելով, որ դա գուցե արվել է կառավարության աշխատակազմի ղեկավարի ջանքերով, որը, գուցե, դա դիտարկել է որպես լավ կարգախոս, սոցիալական գովազդ:
«Եթե խնամի-ծանոթ-բարեկամ սկզբունքը գործեր, հիմա վաղուց մի հատ տպարան կունենայի, էս «բիլբորդները» իմ տպարանում տպված կլինեին, ես արդեն «բիլբորդներ» կունենայի ամբողջ Երևանում, իմ «բիլբորդների» վրա կլինեին ու էդ 100 հազար դոլարը կգնար ոչ թե «ընկերոջ» այլ հենց անձամբ իմ գրպան: Եվ ոչ միայն դա»,- ընդգծեց նա:
Մանրամասները՝ տեսանյութում։
