Առաջարկում ենք վարկերի տոկոսների համաներում, բայց ոչ թե բանկերի հաշվին, այլ պետության սուբսիդավորմամբ․ Միքայել Մելքումյան
Մենք 2 անգամ արտահերթ կարգով նիստ ենք գումարել և բազմաթիվ առաջակություններ և առաջադրած կետեր կային, և այդ կետերից մեկով պետք է առնվազն 3 ամսով ոչ թե սառեցնել, այլ համաներում անել վարկերի մասով։ Այս մասին ԱԺ ճեպազրույցների ընթացքում ասաց ԲՀԿ խմբացության պատգամավոր Միքայել Մելքումյանը՝ պատասխանելով հարցին, թե արտակարգ դրությամբ պայմանավորված՝ ԲՀԿ-ն առաջարկել է առնվազն 3 ամսով իրականացնել վարկային տոկոսների համաներում՝ պետության սուբսիդավորմամբ, արդյոք սա չի՞ հանգեցնի ինֆլյացիայի և ֆինանսական անկայունության ռիսկի։
«Մենք ասում ենք՝ այս փուլում ստեղծված ճգնաժամային իրավիճակում քանի որ չկա այնքան շրջանառություն, որ ոչ միայն չի կարողանում ընթացիկ աշխատավարձ տալ և գործունեություն ծավալել, այլև մի բան էլ էդ վարկերն են։ Իսկ այդ վարկերը 1 միլիոն 600 հազար են, որից 560 հազարը՝ սպառողական»,- ասաց Մելքումյանը։
Նա ասաց, որ անելանելի վիճակ կստեղծվի և դրա համար առաջարկում են տոկոսների համաներում, բայց ոչ թե բանկերի հաշվին, քանի որ դրանով վտանգի տակ կդրվի ավանդները։
«Մենք ասում ենք, որ պետական բյուջեն պետք է այս պահին սուբսիդավորի, և բանկերն էլ պիտի իմաստավորեն իրենց շահույթների չափը։ Այս քայլը չի բերի որևէ ինֆլյացիայի, քանի որ մեր պահուստները 2,8 միլիարդ են»,- ասաց Մելքումյանը։
Անդրադառնալով հարցին, թե բավարար են համարում կառավարության հակաճգնաժամային միջոցառումները, գուցե հետևենք Վրաստանի օրինակին, որտեղ հայտարարվեց կարանտին և որքանով պետք է փակել քաղաքները, որտեղ կան վարակված անձիք, Մելքումյանը պատասխանեց, որ հակաճգնաժամային գործողությունները պիտի լինեն համալիր։
«Ամեն ինչ պետք է անել ժամանակին։ Մարտի 3-ին ասել ենք, որ այդ տեստավորումը և ռիսկային մարդկանց առանձնացումը պիտի ժամանակին արվեր»,- ասաց պատգամավորը։
