Անժելա Հեքիմյանի 1-ին տեսահոլովակի շնորհանդեսն ու Արմեն Մարությանի եւ Ալլա Վարդանյանի խոստովանությունները
Դերասաններ Արմեն Մարությանի եւ Ալլա Վարդանյանի թոռնուհին՝ Jielmya զարդերի հայկական ապրանքանիշի հիմնադիր Անժելա Հեքիմյանը, որոշել է վերադառնալ իր առաջին մասնագիտությանն ու նորից զբաղվել երաժշտությամբ:
Ռոմանոս Մելիքյանի անվան երաժշտական քոլեջն ու Կոմիտասի անվան կոնսերվատորիայի օպերային երգեցողության բաժինն ավարտած Հեքիմյանն իր առաջին՝ «Չիմանայի» երգի տեսահոլովակն է ներկայացրել:
BRAVO.am-ին պատմել է, որ զարդերով զբաղվելու պատճառով ստիպված է եղել 3 տարով թողնել երաժշտությունը:
«Բայց դադարները շատ լավ են անդրադառնում, քանի որ ավելի լիցքավորված, մոտիվացված ու ասելիքով լեցուն ես վերադառնում: Մեկ տարի առաջ հարսանիքիս ամուսնուս նվիրված երգ կատարեցի, այնքան էր հուզվել ու այնպես հիացած էր նայում ինձ, որ երբեք այդ հայացքը չեմ մոռանա։ Հարսանիքի հաջորդ օրն ասաց, որ անպայման պետք է երգչուհի լինեմ, բայց ժամանակ պետք եղավ, որ հասկանամ, թե ինչ եմ ուզում անել»,-նշել է Հեքիմյանը:
Որոշել է գործունեություն ծավալել էստրադային ժանրում, որը սիրում է ու իրեն հոգեհարազատ համարում: Արդեն 4 ամիս սովորում է դասախոսի մոտ ու շատ բան է հասցրել յուրացնել: Այնպես է ստացվել, որ տեսահոլովակում հենց ամուսնու հետ է նկարահանվել:
«Ուզում էի կիսվել, որ ամուսնացած եմ ու երջանիկ: Ամուսինս թեեւ նկարվելու փորձ չունի, բայց միանգամից մտավ դերի մեջ ու ինձ զարմացրեց: Տեսահոլովակը բավական արագ ենք նկարել՝ ընդամենը 17 ժամում: Հուսով եմ՝ մարդիկ կսիրեն: Փորձել եմ երգի միջոցով սեր փոխանցել, որպեսզի ունկնդիրները զգան իմ ջերմությունն ու էներգիան։ Շարունակելու եմ նաեւ զարդերով զբաղվել, մեծ ցանկության դեպքում կստացվի համատեղել: Ինձ համար առաջնայինն ընտանիքս է, ապա երգեցողությունն ու զարդերը»,- ավելացրել է նա:



