Իշխանափոխությունից հետո Փաշինյանի կողքին մնացել են ոչ միայն պողոսները, այլև պաշտոնյաները, որոնք նախկինում գործ չեն ունեցել կամ <<Սորոսի գրասենյակի>> հաճախորդ են եղել․ Գագիկ Համբարյան
ՀՀ վարչապետ Նիկոլ Փաշինյանի կողքին ոչ միայն պողոսներն են մնացել, այլ նաև «հարմարվողները»․ այս մասին Tert.am-ի հետ զրույցում հայտարարեց քաղաքագետ Գագիկ Համբարյանը:
Նա նշեց, որ իշխանափոխությունից հետո հիմնականում պաշտոնյաներ են դարձել այն անձինք, որոնք, շատ դեպքերում, նախկինում գործ չեն ունեցել կամ եղել հանրաճանաչ «Սորոսի գրասենյակի» հաճախորդներ:
Ըստ նրա՝ այսօր Փաշինյանի իշխանությունից հեռանում են, այսպես ասած, ինտելեկտուալ կադրերը: «Հեռանում են, որովհետև չեն կարող երկար դիմակայել այն քաղաքական գծին, որը իրենց պարտադրում է Նիկոլ Փաշինյանը, իսկ Նիկոլ Փաշինյանը պարտադրում է մեկ բան անել՝ այն, ինչ ինքն է ուզում: Նա երբևիցե որևէ մեկի կարծիքը ինչ-որ հարցի վերաբերյալ չի քննարկում»,- ասաց նա և նշեց, որ դրա վառ օրինակը երեկ BBC հեռուստաընկերությանը տված ԱԳՆ նախարար Զոհրաբ Մնացականյանի հարցազրույցն էր:
«Դա խայտառակ հարցազրույց էր: Ես որքան նկատեցի՝ պարոն Մնացականյանը ուղղակիորեն պարոն Փաշինյանի քաղաքական գծի՝ կոնկրետ Արցախյան հիմնահարցի լուծման քաղաքական գծի զոհն է: Միջազգային ասպարեզում մենք այսպիսի նողկալի և մեղկ վիճակում 91 թվականից այս կողմ չենք գտնվել: Եթե պարոն Մնացականյանը մի փոքր ինքնասիրություն ունի, այդ հարցարզույցից հետո պետք է հրաժարական տար»,- նշեց նա:
Նրա խոսքով՝ ինքնասիրություն ունեցող շատ մարդիկ կամ լուռ են հեռանում Փաշինյանի կառավարությունից, կամ՝ դուռը շրխկացնելով, որովհետև Փաշինյանը, որքան էլ իրեն հռչակում է ժողովրդավար, իրականում այլախոհությունը բացարձակ չի հանդուրժում:
«Հենց սրանով է պայմանավորված, որ ինտելեկտուալ մարդը շատ երկար չի կարող դիմանալ այս մթնոլորտում, այս իրավիճակում»,- նշեց նա:
Համբարյանը նկատեց, որ հիմա Փաշինյանին քննադատում են ոչ միայն նրա կողմից հռչակված «սևերը», այլ նաև հասարակության լայն զանգվածի այլ ներկայացուցիչներ, այդ թվում՝ իրավապաշտպաններ և, նույնիսկ, միջազգային հայտնի կազմակերպություններ, որոնք ծափողջուններով են ընդունել իշխանափոխությունը ՀՀ-ում:
Որպես օրինակ՝ նա նշեց իրավապաշտպան Ավետիք Իշխանյանին, որը, ըստ նրա՝ հիմա օբյեկտիվ քննադատում է Փաշինյանին, և «Թրանսփարենսի ինթերնեյշնլի» երևանյան ներկայացուցչին, որը քննադատել է նախարարների, փոխնախարարների և մարզպետների աշխատավարձերի 100 տոկոսով բարձրացումը, որը վերջինս բնութագրել էր ոչ թափանցիկ:
«Այսինքն՝ նույնիսկ պահեր կան, երբ նույն իշխանափոխությունը ողջունած, նույնիսկ իշխանափոխությունը Հայաստանում բացահայտ հովանավորած կազմակերպությունները, այդ թվում՝ միջազգային, իրենց դժգոհությունն են հայտնում պարոն Փաշինյանի գործունեությունից: Հիմա խնդիրը հետևյալն է՝ պարոն Փաշինյանը, դեռ գտնվելով հետհեղափոխական էյֆորիայի մեջ, և մտածելով, որ իր վարկանիշը հասարակության մոտ դեռ 70 տոկոս է ու ինքն ինչ ուզենա՝ կանի, բացահայտ արհամարհելով բոլոր տեսակի օրենքները՝ չգրված և գրված, մտածում է, որ այս ամեն ինչով շատ երկար կառավարելու է, ապա չարաչար սխալվելու է»,- նշեց նա:
Նա նշեց, որ Փաշինյանի կողքին ոչ միայն պողոսներն են մնացել, այլ նաև «հարմարվողները»: «Իշխանափոխությունից հետո հիմնականում պաշտոնյաներ են դարձել այն անձինք, որոնք նախկինում գործ չեն ունեցել կամ եղել են հանրաճանաչ «Սորոսի գրասենյակի» հաճախորդներ: Հիմա խնդիրն այն է, որ այս երկու թևերն են հիմնականում իշխանության մեջ մնացել, և նրանք պայքար են մղում միմյանց հետ, թե ում դիրքերն ավելի կուժեղանան Փաշինյանի շրջապատում»,- ասաց նա:
Նա նշեց, որ հիմա հասարակության մոտ գալիս է սթափության ժամանակը և հիմա հասարակությունը սպասում է կոնկրետ քայլերի. «Հասարակության մեծ մասի համար շատ կարևոր է սոցիալ-տնտեսական վիճակի կարգավորումը, գազի գների շուրջ ընթացող բանակցությունները, որովհետև մենք արդեն մտնում ենք ջեռուցման սեզոն, և դա է հետաքրքրում ՀՀ բոլոր բնակիչներին: Մինչև հիմա Փաշինյանի իշխանությունը չի բացահայտում՝ գազի սակագինը թանկանալո՞ւ է, թե՞ ոչ: Փաշինյանը գնում է Մոսկվա, հանդիպում է Նիկիտա Սիմոնյանի և Արմեն Ջիգարխանյանի հետ, այնինչ դա բացարձակ չի հետաքրքրում ՀՀ բնակիչներին. կոնկրետ ինձ՝ որպես հասարակության անդամ, բացարձակ չի հետաքրքրում, դա կարող է լինել անձնական այց, բայց ինձ հետաքրքրում է գազի գինը»,- հայտարարեց նա:
Համբարյանը նաև հավելեց. «Ես չեմ ուզում Նիկոլ Փաշինյանի կողմնակիցներին ասել անգրագետներ կամ, ինչպես Բաբկեն Թունյանն էր ասում, պողոսներ, բայց ամեն դեպքում նրա կողմնակիցների մեծ մասը ինտելեկտուալ շատ ցածր մակարդակում է գտնվում կամ հետհեղափոխական էյֆորիայից դեռ չի ձերբազատվել. Փաշինյանն ու իր կողմնակիցները շատ դեպքերում պետական մտածելակերպ չունեն, նրանք առաջնորդվում են անձնական և սեփական թիմային շահերով»: