Իրավիճակից դուրս գալու միակ լուծումը միասնական քայլերն են. քրդագետ Սարգիս Գրիգորյանը՝ սիրիահայ համայնքի ճակատագրի մասին (տեսանյութ)
Սա սիրիական հակամարտության շրջադարձայի փուլերից մեկն է: Այսօր մամուլի ասուլիսին այս մասին ասաց ԵՊՀ հայագիտության հետազոտությունների ինստիտուտի հայ-քրդական առնչությունների բաժնի գիտաշխատող Սարգիս Գրիգորյանը՝ անդրադառնալով Սիրիայում Թուրքիայի կողմից կազմակերպված «Խաղաղության ակունք» ռազմական օպերացիային Քրդստանի աշխատավորական կուսակցության և «Իսլամական պետության» դեմ:
«Սա տեղի ունեցավ հիմնականում ԱՄՆ-ի համաձայնությամբ, թե թուրքերը ինչ խորությամբ պետք է մտնեն, և եթե թուրքերը մտել են, ապա սա ցույց է տալիս, որ որոշակի պայմանավորվածություն կա: Ժամանակը ցույց կտա, թե թուրքերը որքան են պատրաստ առաջ շարժվել»,-ասաց նա և նշեց, որ պատկերը շատ ավելի վատն է, քան մենք կարող էինք սպասել:
Սարգիս Գրիգորյանը նշեց, որ Թուրքիայի բանակը ազգային բանակ համարելը մեղմ է ասված, քանի որ այնտեղ կան նաև իսլամիստներ, թուրքական տարբեր խմբավորումներ, որոնք բռնություններ են իրականացնում: «Արդեն նկատվում է, որ քրդերը, ըստ էության, Դամասկոսի հետ պայմանավորվում են և սիրիական բանակը քրդական վերահսկողության տարածքներ են մտնում, և սա կարող է զսպել թուրքերի առաջխաղացումը»,-ասաց նա և նշեց, որ ամեն ինչ կախված է նրանից, թե Դամասկոսը, Մոսկվան և Անկարան ինչ կպայմանավորվեն, ինչպես նաև կարևորեց Վաշինգտոնի դերակատարումը:
«Սիրիական հակամարտությունում լուծումները լոկալ են: Գլոբալ առումով հակամարտության լուծում չկա, բայց լոկալ առումով այս հատվածի համար լուծումը ժամանակը ցույց կտա»,-ասաց նա:
Անդրադառնալով տարածվող լուսանկարներին, որոնք ոչ միայն վերաբերում են այս մարտերին, Սարգիս Գրիգորյանը նշեց, որ այդ նկարների տարածելը ձեռնտու է Թուրքիային, որ ցույց տա, թե այս հատվածում այնքան թեժ է վիճակը, որ քրդերին մղեն տարածքաշրջանը լքելուն: «Բայց լուսանկարներ, տեսանյութեր այս թեժ մարտերից էլ կան, ես տեսել եմ, թե ինչպես են գնդակահարում անմեղ մարդկանց: Լայնամասշտաբ ռազմական գործողություններ չկան, բայց լոկալ առումով թեժ մարտեր են»,-ասաց Սարգիս Գրիգորյանը և նշեց, որ թեժ մարտերի տարածքում հայեր եղել են, բայց երբ լարվել է իրավիճակը, իրենց կամքով դուրս են եկել:
«Մեր ԱԳՆ-ի ուղերձը բավականին հստակ էր, նման ուղերձ չէի լսել, սա առաջին քայլն էր: Երկրորդ քայլը, կարծում եմ, որ պետք է լինի այն, որ աշխատանք տարվի հայ համայնքի հետ: Այս իրավիճակից դուրս գալու միակ լուծումը միասնական քայլերն են՝ համայնքի ճակատագրի մասով, որ ամեն անգամ այս թեժ պահերին, երբ հայ օջախները թիրախավորվում են, չխոսենք, թե ինչ պետք է անել»,-ասաց նա:
