Թուրքիայից վերադարձած «Ազովի» հրամանատարները պատրաստ են մասնակցելու պատերազմին

«Ազով» գումարտակի հրամանատար Դենիս Պրոկոպենկոն հայտարարել է, որ Թուրքիայից Ուկրաինա վերադառնալուց հետո «Ազովստալի» ազատ արձակված բոլոր հինգ հրամանատարները «հնարավոր ամեն բան կանեն պատերազմն ավարտելու համար», տեղեկացնում է ՈՒՆԻԱՆ-ը։

Զորամասերից մեկում կայացած մամուլի ասուլիսում, պատասխանելով այն հարցին, թե հրամանատարներն, արդյո՞ք, նախատեսում են ռազմաճակատ վերադառնալ, նա պատասխանել է․ «Իհարկե, դրա համար ենք վերադարձել Ուկրաինա, դա մեր ամենագլխավոր նպատակն է»։

Ավելի վաղ Ուկրաինայի նախագահ Վլադիմիր Զելենսկին տեղեկացրել էր Թուրքիայից «Ազովի» հինգ հրամանատարների վերադարձի մասին, որոնք ռուսաստանյան գերությունից ազատ էին արձակվել 2022-ի սեպտեմբերին և գտնվում էին Թուրքիայում փոխանակման պայմաններում։

Կրեմլը «Ազովի» հրամանատարների Ուկրաինա վերադարձը ինչպես ուկրաինական կողմից, այնպես էլ թուրքական կողմից պայմանավորվածությունների խախտում է անվանել։

Share This