Վիրուսային դարձած բանանի արվեստի գործը կրկին վաճառվել է․ այս անգամ՝ 6,24 միլիոն դոլարով
Նյու Յորքում Sotheby’s-ի աճուրդում Մաուրիցիո Կատելանի «Comedian» արվեստի գործը վաճառվել է 6,24 միլիոն դոլարով՝ գերազանցելով փորձագետների սպասելիքները։ Աշխատանքը, որի վրա պատկերված է բանան, որը ամրացված է պատին, վիրուսային էր դարձել 2019 թվականին՝ բանավեճ առաջացնելով արվեստի բնույթի մասին: Այնուհետեւ այն վաճառվել է 120.000 դոլարով՝ Մայամիի Art Basel տոնավաճառում, եւ այժմ դրա հայեցակարգային արժեքը եւս մեկ անգամ հաստատվել է։
Գնորդը չինացի կոլեկցիոներ Ջասթին Սունն էր, ով «Comedian»-ն անվանել է մշակութային ֆենոմեն, որը միավորում է արվեստը, մեմերը եւ կրիպտո համայնքը: Կտորի հետ նա ստացել է ժապավեն, բանան, վկայական եւ տեղադրման հրահանգներ, քանի որ յուրաքանչյուր ցուցադրությամբ փոխարինվում են աշխատանքի նյութերը։
«Comedian»-ի գաղափարը բազմաթիվ քննարկումների տեղիք է տվել։ Ոմանք դա համարում են կոնցեպտուալ արվեստի ավանդույթների շարունակություն, իսկ ոմանք՝ պարզապես սադրանք: Մեկ անգամ չէ, որ բանանը դարձել է ներկայացումների առարկա։ 2019 թվականին նկարիչ Դեյվիդ Դաթունան կերավ այն՝ այն անվանելով արվեստի նոր ակտ, իսկ 2023 թվականին հարավկորեացի ուսանողը նույնն արեց՝ սովից դրդված։
Մինչ վաճառքը գործը ցուցադրվել է աշխարհի խոշոր մշակութային կենտրոններում, իսկ ինքը՝ Ջասթին Սունն, ասել է, որ առաջիկա օրերին, նույնպես, ծրագրում է բանան ուտել՝ այս եզակի գեղարվեստական փորձի շրջանակներում։ «Comedian»-ը շարունակում է մնալ ժամանակակից արվեստի խորհրդանիշ՝ ստիպելով մտածել դրա արժեքի եւ սահմանների մասին։