Թրամփը կարծում է, որ Մեգան Մարքլը չափազանց լուրջ է վերաբերվում լրատվամիջոցների քննադատություններին
Հինգշաբթի LBC ռադիոկայանի եթերում Brexit-ի ջատագով, բրիտանացի քաղաքական գործիչ և հաղորդավար Նայջել Ֆարաջի հետ հեռախոսազրույցում ԱՄՆ նախագահ Դոնալդ Թրամփը խոստովանել է, որ դիտել է արքայազն Հարիի և նրա կնոջ՝ Մեգան Մարքլի մասին պատմող վավերագրական ֆիլմը՝ նշելով, որ նախկին դերասանուհին «չափազանց լուրջ է վերաբերվում բրիտանական լրատվամիջոցների քննադատություններին»:
«Կարծում եմ՝ վերաբերմունքն այդ հարցի շուրջ փոքր-ինչ պետք է փոխել. նա չափազանց լուրջ է վերաբերվում դրան, սակայն լիովին հասկանում եմ նրան»,- հայտնել է Թրամփը և հավելել, որ անձամբ չի ճանաչում Սասեքսի դքսուհուն:
Թրամփն իր խոսքում գովաբանել է Հարիին և բրիտանական թագավորական ընտանիքի մյուս անդամներին. «Նա (Հարին) գերազանց երիտասարդ է: Ամբողջ ընտանիքն է գերազանց»:
73-ամյա նախագահը նաև խոսել է հունիսին Մեծ Բրիտանիա կատարած այցի մասին՝ այն որակելով «հիասքանչ», իսկ Մեծ Բրիտանիայի թագուհի Էլիզաբեթ 2-րդին՝ «նմանը չունեցող կին»:
Վերհիշելով Բուքինգհեմյան պալատում թագուհու հետ պետական ընթրիքը՝ Սպիտակ տան ղեկավարն ասել է. «Հիանալի երեկո էր. ինձ հայտնեցին, որ նա նույնպես մեծ բավականություն էր ստացել ընթրիքից»:
Lրագրող Թոմ Բրեդբիի «Հարի և Մեգան. Աֆրիկյան ճանապարհորդություն» վավերագրական ֆիլմը պատմում է ոչ միայն զույգի՝ բոլորովին վերջերս Աֆրիկա կատարած այցի մասին, այլև ներկայացնում է թագավորական զույգի զգացմուքներն ու բրիտանական մամուլի հետ մղած պայքարը: