Թութանհամոն փարավոնի մահվան պատճառի նոր վարկած է առաջ քաշվել

Երկար ժամանակ հավատում էին, որ Եգիպտոսի փարավոն Թութանհամոնը (կառավարման մոտավոր ժամանակահատվածը՝ մ.թ.ա. 1332-1323) մահացել է բաց վերքից, քանի որ նա ավելի ու ավելի էր թուլանում մալարիայից:

Բայց եգիպտագետ Սոֆիա Ազիզն առաջարկել է նոր տեսություն, որը ենթադրում է, որ երիտասարդ փարավոնը կարող էր զոհվել հարբած վիճակում վթարի ենթարկվելու հետեւանքով:

Հենց այդ վթարի պատճառով նա ստացել է կյանքի համար վտանգավոր ոտքերի կոտրվածքներ, որոնք բորբոքվել են եւ հանգեցրել դանդաղ մահվան, պնդում է նա BBC Science Focus-ին տված հարցազրույցում:

2010 թվականին եգիպտագետների խումբը Փարավոնի մումիայի ռադիոլոգիական հետազոտություն է անցկացրել՝  ավելի լավ հասկանալու նրա մահվան պատճառը:

Պարզվել է, որ Փարավոնը, որը մահվան պահին ընդամենը 19 տարեկան էր, տառապում էր ոչ միայն մալարիայով, այլեւ բազմաթիվ հիվանդություններով:

Հետազոտողները եկել են այն եզրակացության, որ իրականում նրան սպանել է ոտքի կոտրվածքը, որի պատճառը մնացել է չբացահայտված:

Փորձագետներն ավելի վաղ հայտնել են, որ Թութանհամոնի դամբարանում հայտնաբերված սերմերն ու մրգերը վկայում են, որ նա բժշկական օգնություն է ստացել:

Բայց Ազիզը ցույց է տալիս վեց կառքեր, զրահ եւ գինու պահոց, որոնք նույնպես հայտնաբերվել են այնտեղ։ Դրանք ապացուցում են, որ նա հաշմանդամ չէր եւ կառքեր էր վարում որպես «ռազմիկ-թագավոր», կարծում է փորձագետը: