Թիթեռների և ցեցերի գոյության հնագույն ապացույցը հայտնաբերել են 236 միլիոն տարվա հնության գոմաղբում
Արգենտինական մի քանի ինստիտուտների հնէաբանների խումբը Մեծ Բրիտանիայից իրենց գործընկերոջ հետ համատեղ Արգենտինայի Տալամպայա ազգային պարկի պեղումների վայրում գտնված արտաթորանքի նմուշներում հայտնաբերել է թեփուկաթևավորների թեփուկների հետքեր։
Journal of South American Earth Sciences ամսագրում հրապարակված հոդվածում խումբը նկարագրում է, թե ինչպես են իրենք հայտնաբերել թեփուկները արտաթորանքի նմուշներում, և թե ինչ է նշանակում այս գտածոն թիթեռներ և ցեցեր ուսումնասիրող գիտնականների համար։
2011 թվականին Տալամպայա ազգային պարկի տեղամասում պեղումներ են սկսվել։ Աշխատանքների ընթացքում պարզվել է, որ այդ վայրում ժամանակին եղել է հին հանրային զուգարան․ բազմաթիվ տարբեր կենդանիներ, այդ թվում՝ շատ խոշոր խոտակերներ, նորից ու նորից օգտագործել են նույն վայրը միզելու կամ կղելու համար։ Տեղում հավաքել են գոմաղբի նմուշներ և ուղարկել տարբեր վայրեր՝ ուսումնասիրության համար։
Այդպիսի նմուշներից մեկը հայտնվել է Լա Ռիոխայի Գիտական հետազոտությունների և տեխնոլոգիաների փոխանցման արգենտինական տարածաշրջանային կենտրոնում, որտեղ էլ այն հայտնաբերել են այս նոր հետազոտությանը մասնակցող գիտնականները։
Գիտնականների թիմը գոմաղբի նմուշը տարել է իրենց լաբորատորիա և ուսումնասիրել տարբեր եղանակներով՝ պարզելով, որ այն մոտավորապես 236 միլիոն տարեկան է, ինչը համապատասխանում է տրիասի ժամանակաշրջանի կեսերին և պերմի անհետացումից ընդամենը 16 միլիոն տարի անց, որի հետևանքով ոչնչացել էր Երկրի վրա կենդանիների բոլոր տեսակների մոտ 90%-ը։ Նրանք նաև հայտնաբերել են մանիատյուր (200 միկրոն երկարությամբ) թեփուկներ, որոնք նրանց հաջողվեց նույնականացնել որպես թեփուկաթևավորների, այսինքն՝ ցեցերի կամ թիթեռների թեփուկներ։
Սա նաև նշանակում էր, որ թիմը, հնարավոր է, նոր տեսակ է հայտնաբերել․ նրանք դրան տվել են Ampatiri eloisae անվանումը։
Ինչպես նշում են գիտնականները, ժամանակային շրջանակները թույլ են տալիս ենթադրել, որ նոր նույնականացված տեսակը, հավանաբար, պատկանել է Glossata կոչվող ենթախմբին, ինչը նշանակում է, որ նա պետք է ունենար կնճիթիկ՝ նման նրանց, որոնք օգտագործում են ժամանակակից ցեցերն ու թիթեռները։
Բայց կա մի էական տարբերություն․ տրիասի ժամանակաշրջանում ծաղիկներ գոյություն չեն ունեցել։ Սա նշանակում է, որ A. eloisae-ն պետք է սնվեր փշատերև և սագոյի ծառերի վրա առաջացող շաքարի կաթիլներով։