ԱՄՆ-ում որոշ դեղամիջոցների վրա թուրինջի հետ անհամատեղելիության մասին նախազգուշացումներ կհայտնվեն
Թուրինջը պարունակում է վիտամին C և կալիում, սննդանյութեր, որոնք անհրաժեշտ են մարդու օրգանիզմի կանոնավոր գործունեության համար: Սակայն թուրինջի հյութը և թուրինջից պատրաստված այլ արտադրանքները կարող են ազդել դեղամիջոցների գործողության վրա:
ԱՄՆ Սննդամթերքի և դեղամիջոցների հսկողության վարչությունը պահանջել է, որ դեղատոմսով և առանց դեղատոմսի տրվող դեղամիջոցները, որոնք սովորաբար ընդունվում են խմելու միջոցով, նախազգուշումներ պարունակեն, որ դրանք ընդունելիս թուրինջի օգտագործումն արգելվում է, գրում է Medicak Life Sciences News-ը:
Վարչությունը ներկայացրել է որոշակի դեղամիջոցների օրինակներ, որոնց հետ գրեյպֆրուտի հյութը կարող է խնդիրներ առաջացնել.
Խոլեստերինի մակարդակն իջեցնող որոշ ստատինային դեղամիջոցներ, ինչպիսիք են Զոկորը (սիմվաստատին) և Լիպիտորը (ատորվաստատին):
Արյան բարձր ճնշումը բուժող որոշ դեղամիջոցներ, ինչպիսիք են Պրոկարդիան և Ադալատ ՍՍ-ն (երկուսն էլ՝ նիֆեդիպին):
Փոխպատվաստման մերժումը բուժող որոշ դեղամիջոցներ, ինչպիսիք են Նեորալը և Սանդիմուն պարկուճները կամ խմելու լուծույթը (երկուսն էլ ցիկլոսպորինով): Որոշ հակատագնապային դեղամիջոցներ, օրինակ՝ ԲուՍպարը (բուսպիրոն):
Կրոնի հիվանդության կամ խոցային կոլիտի բուժման համար օգտագործվող որոշ կորտիկոստերոիդներ, ինչպիսիք են Էնտոկորտը և Ուկերիս հաբերը (երկուսն էլ՝ բուդեսոնիդ):
Սրտի ռիթմի խանգարումը բուժող որոշ դեղամիջոցներ, ինչպիսիք են Պասերոնի և Կորդարոնի հաբերը (երկուսն էլ՝ ամիոդարոն):
Որոշ հակահիստամինային դեղամիջոցներ, օրինակ՝ Ալեգրան (ֆեքսոֆենադին):
Միաժամանակ նշվում է, որ թուրինջի հյութը չի ազդում վերը նշված կատեգորիաների բոլոր դեղամիջոցների վրա:
Փոխազդեցության աստիճանը կարող է տարբեր լինել՝ կախված անձից, դեղամիջոցից և թուրինջի հյութի օգտագործված քանակից: