ԱՄՆ Կոնգրեսից հայտնել են Թրամփի իմպիչմենթի հարցով հանրային լսումների մեկնարկի մոտավոր ժամկետը
ԱՄՆ նախագահ Դոնալդ Թրամփի իմպիչմենթի ընթացակարգի շրջանակներում լսումների հանրային փուլը կարող է սկսվել առաջիկա 2-3 շաբաթում: ТАСС գործակալության փոխանցմամբ՝ այս մասին Fox News-ին տված հարցազրույցում ասել է կոնգրեսական Ջիմ Հայմսը, որն ընդգրկված է Կոնգրեսի Ներկայացուցիչների պալատի հետախուզության հարցերով հատուկ հանձնաժողովի կազմում:
«Ամենայն հավանականությամբ, հանրային լսումները կսկսվեն 2-3 շաբաթում: Հարկ է հասկանալ, որ չի կարելի հստակ խոսել ժամկետների մասին, քանի որ մենք դեռ ցուցմունք պետք է վերցնենք ևս մի քանի վկաներից1 նախքան կանցնենք հանրային լսումներին»,- նշել է դեմոկրատը՝ հավելելով, որ հանրային լսումները հեռարձակվելու են հեռուստատեսությամբ:
Հայմսը վստահություն է հայտնել, որ լսումներին ներկայանալու ծանուցում է ուղարկվել նախագահի ազգային անվտանգության հարցերով նախկին խորհրդական Ջոն Բոլթոնին: Կոնգրեսականը հիշեցրել է, որ Բոլթոնն այլևս Սպիտակ տան աշխատակից չի հանդիսանում և կարող է անտեսել վարչակազմի արգելքները:
