Վեց միջոց երկրորդ տիպի շաքարային դիաբետի դեպքում արյան մեջ գլյուկոզայի մակարդակն առանց դեղորայքի կարգավորելու համար
Երկրորդ տիպի շաքարային դիաբետն ամենատարածված ու վտանգավոր հիվանդություններից մեկն է, որին բնորոշ հիմնական խնդիրներից է արյան մեջ շաքարի մակարդակի բարձրացումը։ Սա կարող է շատ վտանգավոր լինել ու առողջական լուրջ խնդիրներ առաջացնել, քանի որ հիպերգլիկեմիան վնասում է կենսական նշանակություն ունեցող օրգեններին արյուն մատակարարող անոթները, ինչը բարձրացնում է սրտանոթային հիվանդությունների, գլխուղեղի կաթվածի, երիկամային խանգարումների ու տեսողության վատթարացման հավանականությունը։
Նման խնդիրներից խուսափելու համար հարկավոր է մշտական վերահսկողության տակ պահել արյան մեջ շաքարի մակարդակն ու ընդունել այդ ցուցանիշը կարգավորող դեղամիջոցներ, սակայն նման դեղորայքի ընդունումն իր հերթին բացասաբար է անդրադառնում օրգանիզմի վրա։ Այնուամենայնիվ Մեծ Բրիտանիայի Առողջապահության ազգային ծառայության ներկայացուցիչները պնդում են, որ գոյություն ունեն շատ պարզ բնական միջոցներ, որոնք օգնում են կարգավորել արյան մեջ շաքարի մակարդակն առանց դեղորայքի։ Ընդ որում՝ այդ միջոցներն արդյունավետ են և չեն առաջացնում որևէ կողմնակի բարդություն։
Դրական տրամադրվածություն
Բժիշկ Սառա Բրյուերի խոսքով՝ առողջության վերականգնման համար հարկավոր է կենտրոնանալ կյանքում տեղի ունեցող դրական իրադարձությունների վրա, այլ ոչ թե բացասական։ Անհրաժեշտության դեպքում անգամ հարկավոր է փորձել փոխել աշխարհայացքը։ «Եթե դուք միայնակ եք, ապա կարող եք նոր տուն փնտրող որևէ կենդանի որդեգրել։ Ընտանի կենդանու մասին հոգ տանելը կհագեցնի ձեր կյանքն ու բազմաթիվ դրական հույզերի աղբյուր կդառնա», – նշում է մասնագետը։
Խուսափել սթրեսից
Սթրեսի մակարդակը բարձրանում է, երբ մարդուն թվում է, թե նա կորցնում է իրավիճակի նկատմամբ վերահսկողությունը։ Նման խնդրից խուսափելու համար մասնագետները խորհուրդ են տալիս նախապես պլանավորել առաջիկա օրվա գործերը։ Բացի այդ, հարկավոր է նաև որոշակի քայլեր ձեռնարկել կենսակերպը բարելավելու ու քաշը նվազեցնելու համար, ինչը նույնպես կօգնի խուսափել սթրեսից։
Փոխել սննդակարգը
Երկրորդ տիպի շաքարային դիաբետի դեպքում արյան մեջ շաքարի մակարդակը նվազեցնելու ամենաարդյունավետ միջոցներից մեկը միջերկրածովյան սննդակարգին հետևելն է։ Հետազոտությունները ցույց են տվել, որ այն բարելավում է գլյուկոզայի մակարդակի վերահսկման բնական մեխանիցմների աշխատանքը։ Բժիշկ Բրյուերի խոսքով՝ հարկավոր է հարստացնել սննդակարգը մրգերով, բանջարեղենով, ձկնատեսակներով, լոբազգիներով, ընկույզներով ու սերմերով՝ միաժամանակ նվազագույնի հասցնելով կամ առհասարակ բացառելով քաղցրավենիքի, ածխաջրերով հարուստ մթերքի, սպիտակ հացի, բրնձի, սպիտակ ալյուրից պատրաստված մակարոնեղենի և նախաճաշի համար նախատեսված որոշակի փաթիլների գործածությունը։
Լինել ֆիզիկապես ակտիվ
Ֆիզիկական ակտիվությունն օգնում է պայքարել վտանգավոր ինսուլինակայունության դեմ և այրել գլյուկոզայի ավելցուկն էներգիա ստանալու համար։ Սա է պատճառը, որ բրիտանացի բժիշկները խորհուրդ են տալիս օրական գոնե կես ժամ քայլել, իսկ շաբաթական՝ առնվազն 150 րոպե։ Բացի այդ, շատ օգտակար կարող են լինել նաև լողն ու յոգան։
Ֆիտոթերապիա
Երկրորդ տիպի շաքարային դիաբետը կարելի է հեշտությամբ պահել վերահսկողության տակ օգտակար սովորությունների միջոցով։ Օրինակ՝ շաքարի մակարդակի կարգավորման համար շատ արդյունավետ կարող են լինել բնական բուսական միջոցները, որոնք դրական ազդեցություն են ունենում ինսուլինի արտադրման գործընթացի վրա։ Շատ օգտակար կարող է լինել դարչինը, որը պաշտպանում է ինսուլինակայունության զարգացումից, քրքումը, որն օգնում է վերահսկողության տալ պահել գլյուկոզայի մակարդակը, ինչպես նաև շամբալան, որի գործածությունը դանդաղեցնում է ածխաջրերի յուրացման գործընթացն ու այդ կերպ կանխում է շաքարի մակարդակի կտրուկ տատանումները։
Բավարար քանակությամբ ջուր խմել
Օրվա ընթացքում բավարար քանակությամբ ջուր խմելը կանխում է օրգանիզմի ջրազրկումն ու օգնում է երիկամներին մեզի միջոցով դուրս բերել ավելորդ շաքարն օրգանիզմից։ Սակայն մասնագետները նախազգուշացնում են, որ ջրի գործածությունից բացի հարկավոր է խուսափել քաղցր ըմպելիքներից, քանի որ դրանք չեն կարող է փոխարինել ջրին, սակայն կարող են բարձրացնել արյան մեջ շաքարի մակարդակը։
Նյութի աղբյուրը՝ medikforum.ru