The Guardian. Ուկրաինայի հարաբերությունները Մեծ Բրիտանիայի հետ վատթարացել են լեյբորիստների իշխանության գալուց հետո
Ուկրաինայի հարաբերությունները Մեծ Բրիտանիայի հետ «վատթարացել են» հուլիսին լեյբորիստական կառավարության իշխանության գալուց հետո: Այս մասին Կիևի պաշտոնյաներն ասել են The Guardian թերթին՝ հիասթափություն հայտնելով, որ Բրիտանիան չի կարողացել ավելի շատ հեռահար հրթիռներ մատակարարել:
Մեծ Բրիտանիայի վարչապետը դեռևս չի այցելել Ուկրաինա՝ պաշտոնը ստանձնելուց չորս ամիս անց, և հիասթափված Կիևը ասում է, որ այդ այցն ապարդյուն կլինի, քանի դեռ Քեյր Սթարմերը հանձն չառնի վերամատակարարել «Storm Shadow» երկարաժամկետ հեռահար համակարգը:
«Իմաստ չկա, որ նա որպես զբոսաշրջիկ գա»,- ասել է Ուկրաինայի նախագահ Վլադիմիր Զելենսկու վարչակազմի բարձրաստիճան պաշտոնյաներից մեկը։
Ուկրաինան ավելի ու ավելի դժգոհ է Լոնդոնից, քանի որ ռուսական զորքերը 2022 թվականից ի վեր ամենաարագ տեմպերով առաջ են շարժվում դեպի երկրի արևելք, և ԱՄՆ պաշտոնյաները եզրակացնում են, որ առաջնագիծն այլևս չի կարող ստատիկ համարվել: Ուկրաինացի հրամանատարներն ասել են, որ իրենք զգալիորեն զիջում են զորքերի թվաքանակի առումով:
Ուկրաինայի՝ Միացյալ Թագավորության դեմ ուղղված հիմնական բողոքն այն է, որ նա ոչ մի լրացուցիչ հրթիռ չի մատակարարել իր Storm Shadow պահեստից, նույնիսկ Ղրիմում և 2014 թվականից Ռուսաստանի կողմից օկուպացված այլ ուկրաինական տարածքների թիրախների դեմ օգտագործելու համար:
«Սա տեղի չի ունենում. Սթարմերը մեզ հեռահար զենք չի տալիս։ Իրավիճակն այլևս նույնը չէ, ինչ Ռիշի Սունակի վարչապետ եղած ժամանակ էր։ Հարաբերությունները վատացել են»,- պարբերականին հայտնել է ուկրաինացի պաշտոնյան։