Չիլիում չդադարող բողոքի ակցիաների հետևանքով ավելի քան 1600 տուժած գտնվում է հիվանդանոցում
Չիլիի Մարդու իրավունքների ազգային ինստիտուտը թարմացրել է երկրում բողոքի ակցիաների ընթացքում տուժածների և ձերբակալվածների մասին տվյալները, որի համաձայն՝ շուրջ երեք շաբաթ անց հիվանդանոցներում է գտնվում 1659 մարդ, նրանց կեսից ավելին՝ հրազենային վնասվածքներով, գրում է ria.ru-ն:
«Հոկտեմբերի 17-ից նոյեմբերի 4-ն ընկած ժամանակահատվածը ներառող թվերը ձեռք են բերվել Մարդու իրավունքների ազգային ինստիտուտի կողմից՝ ցույցերի, ոստիկանական տեղամասերի և բժշկական կենտրոնների դիտարկման ընթացքում»,- ասված է իրավապաշտպանների՝ Twitter-ում հրապարակված տվյալների պարզաբանման մեջ:
Իշխանությունների տեղեկություններով՝ բախումների հետևանքով զոհվել է 19 մարդ, այդ թվում՝ իրավապահ մարմինների և Պաշտպանության նախարարության 5 աշխատակից: Չիլիի նախագահ Սեբաստիան Պինյերան երկրում չդադարող բողոքի ցույցերի ֆոնին փոխել է կառավարության առանցքային նախարարներին, այդ թվում՝ ներքին գործերի նախարարին:
Հիշեցնենք, որ հոկտեմբերի 6-ին Չիլիի իշխանությունները մետրոյի ուղեվարձը 30 չիլիական պեսոյով (0,042 դոլար) բարձրացնելու որոշում էին կայացրել, ինչը բողոքի ցույցերի պատճառ էր դարձել: Ցուցարարները պահանջում են նաև իրենց կենսապայմանների բարելավում, աշխատավարձերի բարձրացում: Խաղաղ ակցիաներն այնուհետև վերաճել էին իրավապահների հետ բախումների: Ցուցարարները բարիկադներ էին կառուցել մետրոյի կայարանների մոտ՝ զգալի վնաս հասցնելով մետրոպոլիտենին: Նրանք նաև խանութներ և ավտոբուսներ էին այրել, երկրի մեծ քաղաքներում փողոց էր դուրս բերվել զրահատեխնիկա: