Արտասովոր ախտանշաններ, որոնք կարող են պայմանավորված լինել ստամոքսի քաղցկեղով
Ստամոքսի քաղցկեղը դասվում է այն հիվանդությունների շարքին, որոնց վաղ հայտնաբերումը շատ կարևոր է հետագա բարեհաջող բուժման համար, սակայն մարդիկ ոչ միշտ են ուշադրություն դարձնում հիվանդության մասին հուշող ախտանշաններին և մասնագետին են դիմում, երբ հիվանդությունն արդեն բավական զարգացած է լինում: Նման խնդիրներից խուսափելու համար մասնագետները նշել են այն վաղ ախտանշանները, որոնցով դրսևորվում է հիվանդությունը: Շատ հաճախ մարդիկ այս ախտանշանները վերագրում են այլ խնդիրներին, ուստի մասնագետները հորդորում են ավելի զգոն լինել:
Քաղցկեղի այս տեսակի մասին հուշող ախտանշաններից մեկը կարող է լինել շուտ հագենալն ու ստամոքսի լիքը լինելու զգացողությունը: Սա հատկապես վտանգավոր է լինում, եթե նախկինում նման խնդիրներ նկատված չեն լինում: Եթե սնվելու ցանկությունն անհետանում է անգամ չնչին քանակությամբ սննդի գործածությունից հետո, ապա հարկավոր է անհապաղ դիմել մասնագետին:
Անհանգստացնող ախտանշանների շարքին պետք է դասվի նաև հաճախակի փորափքանքը: Հարկ է հիշել, որ ստամոքսի քաղցկեղի դեպքում սովորաբար փորափքանքն ի հայտ է գալիս կտրուկ և կարող է անհանգստացնել բավական երկար ժամանակ:
Ոռուցքի առկայության մասին կարող է հուշել նաև դիսֆագիան, որը կլման ակտի խանգարումն է: Այս դեպքում սնունդն ու հեղուկը կուլ տալու դեպքում հիվանդի մոտ ցավոտ զգացողություններ են առաջանում, իսկ սնվելիս կարող են անհանգստացնել հազն ու շնչահեղձությունը: Որպես կանան նման դեպքերում հիվանդի մոտ առաջանում է կոկորդում օտար մարմնի առկայության զգացողություն, գրում է actualnews.org կայքը: