Հայ-չինական հարաբերությունները որակական վերափոխման են ենթարկվել. պատմաբան
Վերջին տարիներին հայ-չինական հարաբերությունները որակական տրանսֆորմացիա են կրել, որը բնութագրվում է քաղաքական համագործակցության ակտիվացմամբ, տնտեսական կապերի խորացմամբ, ինչպես նաև մշակութային, գիտական և կրթական փոխգործակցության զարգացմամբ։ Այս մասին դեկտեմբերի 17-ին «Չինաստանի և Հայաստանի միջև ռազմավարական գործընկերության ամրապնդում. երկխոսություն կառավարման ոլորտում փորձի փոխանակման մասին» թեմայով գիտաժողովի ժամանակ հայտարարել է Հայաստանի Գիտությունների ազգային ակադեմիայի Արևելագիտության ինստիտուտի տնօրեն, պատմական գիտությունների թեկնածու Գոհար Իսկանդարյանը:
Նրա խոսքով՝ սա հատկապես արդիական է չինական առաջադեմ կառավարման մոդելի ուսումնասիրության առումով։ Նա հավելել է, որ Չինաստանի փորձը հետաքրքիր է ոչ միայն զարգացող, այլև զարգացած երկրների համար։
Իսկանդարյանն ընդգծել է, որ այս մոդելի գիտական ուսումնասիրությունը, դրա համադրումը ազգային առանձնահատկությունների հետ և զարգացումը երկխոսության տեսքով կարող են նպաստել փոխըմբռնման խորացմանը և երկու երկրների միջև երկարաժամկետ հարաբերությունների ամրապնդմանը: «Հայաստանի Գիտությունների ակադեմիայի Արևելագիտության ինստիտուտը միշտ առանձնահատուկ ուշադրություն է դարձրել Չինաստանի հետ գիտական համագործակցության զարգացմանը: Վերջին երկու տարիների ընթացքում այդ համագործակցությունը հատկապես խորը և փոխշահավետ բնույթ է ձեռք բերել: Այդ ընթացքում մենք համատեղ միջազգային գիտական համաժողովներ ենք անցկացրել, կազմակերպել ենք փոխադարձ այցելություններ և ապահովել ենք ակտիվ մասնագիտական երկխոսություն գիտնականների ու հետազոտողների միջև, ինչը զգալիորեն նպաստել է փոխադարձ վստահության և գիտական ներուժի արդյունավետ համադրմանը», – եզրափակել է նա: