Ծառուկյանը ռևանշ-մենամարտ կանցկացնի Պուլասի հետ․ հայտնի են մանրամասները
UFC-ի թեթև քաշային կարգի առաջատար մարտիկ Արման Ծառուկյանը գրեփլինգի կանոններով ռևանշ-մենամարտ կանցկացնի Ջորջիո Պուլասի հետ։ Այս գոտեմարտը կկայանա RAF 6 մրցաշարում նրանց միջև գրանցված սկանդալային միջադեպից ընդամենը մի քանի օր անց։
Մենամարտը նշանակված է մարտի 11-ին և տեղի կունենա Ռիո դե Ժանեյրոյում կայանալիք Hype FC մրցաշարի շրջանակում։ Այն կտևի 10 րոպե և կանցկացվի հաղթանակ միայն ցավեցնող կամ խեղդող հնարքով ձևաչափով։
Հիշեցնենք, որ անցած շաբաթ օրը կայացած RAF 6 մրցաշարի եռառաունդ մենամարտում Ծառուկյանը մրցավարների որոշմամբ հաղթել էր Պուլասին։ Սակայն հանդիպման ավարտից անմիջապես հետո հայ մարտիկը տապալել էր մրցակցին և հարվածել նրան, ինչն էլ վերածվել էր զանգվածային քաշքշուկի ու ծեծկռտուքի։
Նշենք նաև, որ սա Ծառուկյանի համար հերթական արտամրցաշարային ելույթն է։ Օրերս մարտիկը հայտարարել էր, որ UFC-ի ղեկավարության հետ ունեցած հանդիպումն իրեն հիմք է տալիս ենթադրելու, որ արդեն 2026 թվականին թեթև քաշային կարգում տիտղոսային մենամարտի հնարավորություն կստանա։ Որպես այլընտրանք՝ Ծառուկյանը կարող է BMF տիտղոսի համար մրցել Մաքս Հոլոուեյ — Չարլզ Օլիվեյրա մենամարտի հաղթողի հետ։