Ես եղել եմ Գազայում․ Թրամփ
ԱՄՆ նախագահի հանրապետական թեկնածու Դոնալդ Թրամփը պահպանողական հաղորդավար Հյու Հյուիթին տված ռադիոհարցազրույցում ասել է, որ նախկինում եղել է Գազայի հատվածում։ Սակայն նման այցի փաստագրական ապացույցներ չկան ո՛չ նրա նախագահության տարիներին, ո՛չ էլ գործարար եղած ժամանակ։
«Գազան կարող է նույնիսկ ավելի լավը լինել, քան Մոնակոն: Այն ունի լավագույն դիրքը Մերձավոր Արևելքում, լավագույն ջուրը, ամեն ինչ լավագույնն է: Ես դա ասում եմ տարիներ շարունակ», – ասել է Թրամփը:
Թրամփի նախընտրական շտաբի օգնականը, փորձելով պարզաբանել իրավիճակը, ասել է, որ «Գազան գտնվում է Իսրայելում», և որ Թրամփը այցելել է Իսրայել։ Սակայն, միջազգային իրավունքի համաձայն, Գազայի հատվածը երբեք չի եղել Իսրայելի մաս։
ԱՄՆ նախկին նախագահը քննադատել է ամերիկացի հրեաներին աջակցության բացակայության համար։ «Ես ավելին եմ արել Իսրայելի համար, քան որևէ մեկը: Ես ավելին եմ արել հրեա ժողովրդի համար, քան որևէ մեկը: Եվ սա փոխադարձ չէ, ինչպես ասում են, փոխադարձ չէ»,-ասել է Թրամփը։
Թրամփի խոսքերը կրկին հարցեր են առաջացնում ընտրություններում հաղթելու դեպքում Մերձավոր Արևելքի տարածաշրջանի նկատմամբ նրա հնարավոր մոտեցման վերաբերյալ: Իսրայելում ոմանք, ներառյալ վարչապետ Բենիամին Նեթանյահուի իշխող կոալիցիայի ծայրահեղ աջերը, պաշտպանում են Գազայի վերաբնակեցման և բռնակցման գաղափարը:
Իսրայելին աջակցությունը միշտ եղել է Թրամփի նախընտրական արշավի անկյունաքարը։ Նրա կողմնակիցները բարձր են գնահատել նրա՝ որպես նախագահի մի շարք որոշումներ, այդ թվում՝ ԱՄՆ դեսպանատան տեղափոխումը Թել Ավիվից Երուսաղեմ և համաձայնագիրը, որը կարգավորել է հարաբերությունները Իսրայելի և արաբական որոշ երկրների միջև:
Այս նախաձեռնություններին աջակցել են Իսրայելում Թրամփի նախկին դեսպան Դեյվիդ Ֆրիդմանը և Թրամփի փեսան՝ Ջարեդ Քուշները։ Թրամփը բազմիցս ասել է, որ ինքը Իսրայելի համար ավելին է արել, քան որևէ մեկը։ Նա նաև պնդում է՝ եթե դեմոկրատ թեկնածու Քամալա Հարիսը գա իշխանության, Իսրայելը կդադարի գոյություն ունենալ։