Ռուսաստան-Ուկրաինա պատերազմ, օր 1227․ հուլիսի 5-ի հիմնական զարգացումները
Ռուսաստան-Ուկրաինա պատերազմի 1227-րդ օրը Ուկրաինան հարվածել է Վորոնեժի շրջանում գտնվող Բորիսոգլեբսկի ավիաբազային, որը ծառայում է որպես SU-34, SU-35S և SU-30SM կործանիչների բազա։ Գիշերվա ընթացքում Ռուսաստանի կողմից արձակվել է 322 դրոն և խաբկանքային սարք, որոնցից 157-ը խոցվել են, իսկ 135-ը՝ կորցրել ընթացքը։ Միաժամանակ, Զապորոժիեի ռուսական վերահսկողության տակ գտնվող ատոմակայանը մի քանի ժամ զրկվել է էլեկտրամատակարարումից, ինչը Ուկրաինան բացատրում է ռուսական հրետակոծությամբ։
Հաղորդվում է, որ Ռուսաստանը մի շարք շրջաններում ոչնչացրել է ուկրաինական դրոններ, այդ թվում՝ երկուսը Սանկտ Պետերբուրգի մերձակայքում։ Գերմանիայի և Նիդեռլանդների հետախուզական ծառայությունները հայտարարում են, որ Ռուսաստանը Ուկրաինայում կիրառել է արգելված քիմիական զենքեր, ներառյալ Առաջին համաշխարհայինի ժամանակ օգտագործվող քլորոպիկրինը, ինչը Մոսկվան հերքում է։
ԱՄՆ նախագահ Դոնալդ Թրամփը Գերմանիայի կանցլեր Ֆրիդրիխ Մերցի և Ուկրաինայի նախագահ Վլադիմիր Զելենսկու հետ քննարկել է Patriot համակարգերի մատակարարման հարցը։ Թրամփը նաև հայտնել է, որ Պուտինի հետ հեռախոսազրույցի ընթացքում խոսել է պատժամիջոցների թեմայով՝ հավելելով, որ Պուտինը ցանկանում է շարունակել պատերազմը «պարզապես սպանելու համար»։ Զելենսկին հայտարարել է, որ զրույցը «շատ կարևոր և արդյունավետ» է եղել՝ Ուկրաինայի հակաօդային պաշտպանության բարելավման տեսանկյունից, գրում է Al-Jazeera-ն։