Նա ապրեց կարճ և ներքին հակասություններով լի կյանք․ այսօր Թումանյանի դստեր ծննդյան օրն է

Այսօր Հովհ. Թումանյանի դստեր` Անուշ Թումանյանի ծննդյան օրն է։

Ծնվել է Թիֆլիսում 1898 թ. հունվարի 27-ին: Սովորել է Գայանյան օրիորդաց դպրոցում:

Անուշն աչքի է ընկել առավել ինքնատիպությամբ և ռոմանտիկ խառնվածքով: Ապրել է մի կարճ և ներքին հակասություններով լի կյանք: Օժտված էր երաժշտական բացառիկ ունակություններով, տարված էր գրքերով:

Թումանյանը ժամանակին նկատել էր դստեր հակումները և երկարատև խնայողությունների շնորհիվ ձեռք էր բերել գերմանական արտադրության Բլյուտներ մակնիշի ռոյալ: Անուշը հաճախել է երաժշտական դպրոց: Շատերը նրա համար երաժշտության ասպարեզում վառ ապագա էին գուշակում:

Շուշաններ վարսերին, արդուզարդ, նորաձև հագուստ` կարված սեփական ձեռքերով, ուլունքաշարեր` Անուշի կանացիության վկայություններն են:

Գրել է բանաստեղծություններ, քառյակներ և պոեմներ, նաև երկու պատմվածք. «Ծաղիկը» տպագրվել է Վիեննայում «Արեգ» ամսագրում և «Ինչ պիտի լիներ, ինչ եղավ», որը տպագրվել է «Գարուն» ամսագրում՝ նվիրված իր հռչակավոր հորը:

Լավ տիրապետել է ֆրանսերենին, գրել է պատմվածքներ՝ նաև ֆրանսերեն:

Կյանքից հեռացավ անժամանակ (29 տարեկան)` չհաշտվելով հոր մահվան հետ:

Հովհ.Թումանյանի թանգարան