Ձու ուտելը 29%-ով նվազեցնում է սիրտ-անոթային հիվանդությունների առաջացման վտանգը.
Մոնաշի համալսարանի ավստրալացի գիտնականները հայտնաբերել են, որ ձվի չափավոր օգտագործումը կարող է գրեթե մեկ երրորդով նվազեցնել սիրտ-անոթային հիվանդություններից մահացության վտանգը տարեց մարդկանց համար: Հետազոտությունը հրապարակվել է Nutrients բժշկագիտական հանդեսում:
Փորձագետների եզրակացությունները հիմնված են ASPREE Longitudinal Study of Old Persons (ALSOP) հետազոտական նախագծում ներգրավված 70 և ավելի տարեկան 8756 մեծահասակների տվյալների վրա:
Հետազոտության մասնակիցները կամավոր զեկուցել են ձվի սպառման հաճախականության մասին՝ երբեք/հազվադեպ (ամսական 1-2 անգամ), շաբաթական (շաբաթական 1-6 անգամ) կամ օրական (ամեն օր/օրը մի քանի անգամ): Գիտնականները պարզել են, որ նրանք, ովքեր շաբաթական 1-6 անգամ ձու են ուտում, բոլոր պատճառներով մահացության վտանգը 15%-ով ավելի ցածր է, իսկ սիրտ-անոթային հիվանդություններից մահացության վտանգը ցածր է 29%-ով՝ նրանց համեմատ, ովքեր ձու հազվադեպ են ուտում կամ երբեք ձու չեն կերել:
«Ձուն սննդարար նյութերով հարուստ մթերք է, որը պարունակում է բարձրորակ սպիտակուց, B խմբի վիտամիններ, չհագեցած ճարպաթթուներ, խոլին և այլ կարևոր միկրոէլեմենտներ: Դրանք հատկապես օգտակար են տարիքին առնչվող ֆիզիկական ֆունկցիայի անկում զգացող տարեց մարդկանց համար»,- պարզաբանել է հետազոտության առաջատար հեղինակ Հոլի Ուայլդը:
Հետազոտությունը միաժամանակ ցույց է տվել, որ չափավոր կամ բարձր սննդակարգ պահպանող տարեցների օրաբաժնում ձու ավելացնելը նվազեցնում է սիրտ-անոթային հիվանդություններից մահանալու վտանգը համապատասխանաբար 33%-ով և 44%-ով: Դա ընդգծում է հավասարակշռված սննդակարգի կարևորությունը կյանքի տևողությունը երկարացնելու համար: