ՀՀ կառավարությունը քայլեր է ձեռնարկում սփյուռքահայ գիտնականների ներուժը հայրենիքում օգտագործելու համար. նախարար
Հայաստանի կառավարությունը քայլեր է ձեռնարկում հայրենիքում սփյուռքահայ գիտնականների ներուժն օգտագործելու ուղղությամբ։ Դրա մասին մարտի 18-ին հայտարարել է ՀՀ կրթության, գիտության, մշակույթի և սպորտի նախարար Ժաննա Անդրեասյանը՝ ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում՝ 2024 թվականի պետական բյուջեի կատարման ընթացքի և արդյունքների հաշվետվության քննարկման ժամանակ։
Այդ ուղղությամբ իրականացվող ծրագրի շրջանակում արդեն Հայաստան է վերադարձել 15 գիտնական։ Միաժամանակ 51 գիտնական հեռավար աշխատում է հանրապետությունում գործող գիտահետազոտական խմբերի հետ։
Անդրադառնալով հեռավար աշխատանքին, նախարարը, մասնավորապես, նշել է. «Նրանք կարող են աշխատանքին միանալ արտերկրից տեղական հետազոտական խմբի հետ և ժամանակ առ ժամանակ այցելել Հայաստան։ Այդ առումով ծրագրում հաջողվել է ընդգրկել 51 շահառու՝ նախատեսված 45-ի փոխարեն, սակայն կարևորը ոչ միայն թվերն են, այլև որակը»։